Rossiya prezidenti Vladimir Putin Sochida Turkiya yetakchisi Rajab Toyyib Erdo‘g‘on bilan uchrashuv chog‘ida Moskva don shartnomasi bo‘yicha muzokaralarga tayyor ekanini aytdi.

«Bilaman, siz bugun g‘alla bitimi masalasini ko‘tarmoqchisiz. Biz bu borada muzokaralar uchun ochiqmiz», — dedi Rossiya prezidenti.

G‘alla bo‘yicha kelishuv o‘tgan yilning iyul oyida tuzilgan edi. Uning doirasida Qora dengizda Ukraina portlaridan g‘alla eksporti uchun koridorlar yaratildi. Shartnomalarning ikkinchi qismida Rossiya qishloq xo‘jaligi eksportiga cheklovlarni yumshatish nazarda tutilgandi.

Bitim bir necha bor uzaytirilgan, ammo 17 iyulda Moskva unda ishtirok etishni to‘xtatganini e’lon qilgandi. Sabab – Rossiya kelishuvning ikkinchi qismiga rioya etilmaganini ta’kidladi.

Rossiya o‘z talablariga rioya qilgan holda shartnomalarga qaytishga ruxsat beradi. Ular orasida Rosselxozbankning SWIFT tizimiga qayta ulanishi, qishloq xo‘jaligi texnikalari uchun butlovchi qismlarni yetkazib berishni tiklash, Rossiya o‘g‘itlarini eksport qilishdagi cheklovlarni olib tashlash kabilar bor.