Janubiy Koreyada 21-martda boshlangan o‘rmon yong‘inlari qurbonlari soni 24 nafarga yetdi. Hukumat bu yong‘inlarni mamlakat tarixidagi eng yirik halokatlardan biri sifatida baholadi, deb yozdi Associated Press.

Koreya favqulodda vaziyatlarga chora ko‘rish markazi ma’lumot berishicha, yong‘inlar oqibatida 1300 yillik Gounsa budda ibodatxonasi va 200 dan ziyod binolar kuyib kulga aylangan, 17,5 ming gektar yerga ziyon yetgan. Xavfli hududlardan 27 ming kishi olib chiqilgan, 19 kishi jarohatlangan.

Janubiy Koreya prezidenti vazifasini bajaruvchi Xan Dok Su bayonotiga ko‘ra, juma kunidan buyon tinmayotgan yong‘in shu paytgacha kuzatilgan barcha ofatlardan ko‘ra ko‘proq talafot yetkazdi. U bor kuchlarni jamlab, hafta yakuniga qadar yong‘inni jilovlash shartligini ta’kidladi.

Kuchli shamol uchqunni tarqatib, o‘t o‘chiruvchilarga qiyinchiliklar tug‘dirmoqda. Yong‘inlarga odamlar sababchi bo‘lgani taxmin qilinyapti: ular yerlarni tozalash uchun xas-xashaklarga o‘t qo‘yishgan.