Turkiya prezidenti Toyib Erdo‘g‘on Shvetsiyaning NATO harbiy alyansiga qo‘shilish taklifini parlamentga yuborishga rozi bo‘ldi. Bu haqda Vilnyusdagi NATO sammiti arafasida Bosh kotib Yens Stoltenberg ma’lum qildi.

«Prezident Erdo‘g‘on Shvetsiyaning qo‘shilish protokolini imkon qadar tezroq Buyuk milliy majlisga yuborishga va ratifikatsiyani ta’minlash uchun assambleya bilan yaqindan hamkorlik qilishga rozi bo‘lganini e’lon qilishdan xursandman», – deydi Stoltenberg matbuot anjumanida.

Stoltenberg Shvetsiyaning a’zoligi Turkiya parlamenti – Buyuk milliy assambleya tomonidan ratifikatsiya qilinadigan sanani aytmagan.

Shvetsiya va Finlyandiya o‘tgan yili NATOga a’zo bo‘lish uchun ariza topshirgan edi. Har ikki davlatning harbiy qo‘shilmaslik siyosatidan voz kechishi qaroriga Rossiyaning Ukrainaga bostirib kirishi hamda xavfsizlik masalalarini qayta ko‘rib chiqqanidan so‘ng kelgan edi.

Alyansga arizalar NATOning barcha a’zolari tomonidan ma’qullanishi kerak va aprel oyida Finlyandiyaga ruxsat berilgan bo‘lsa-da, Turkiya va Vengriya Shvetsiyani tashkilot safida ko‘rishni istamay kelayotgan edi.

Erdo‘g‘on esa, o‘z navbatida, Shvetsiyada jangari guruhlar a’zolari, asosan Kurdiston Ishchi partiyasi (PKK) tarafdorlari borligini, ularni namoyishlar uyushtirishda va terrorchi guruhlarni moliyalashda ayblaydi. Stokgolmdagi Turkiyaga qarshi namoyishlar ham uning g‘azabini oshirdi.

Ayni paytda Shvetsiya Turkiya bilan o‘tgan yili muzokaralarda kelishilgan barcha talablarni bajarganligini, jumladan, terror tashkiloti a’zoligini noqonuniy deb belgilovchi yangi qonun loyihasini taqdim etganini va so‘z erkinligi konstitutsiyasida himoyalanganligini ta’kidladi.

Vengriya Bosh vaziri Viktor Orbanning ma’muriyati rahbari ham payshanba kuni Budapesht Shvetsiyaning NATOga a’zoligini ratifikatsiya qilishga to‘sqinlik qilmasligini aytdi. 

Eslatib o‘tamiz, avvalroq prezident Erdo‘g‘on Turkiyaning Yevropa Ittifoqiga qo‘shilishi Shvetsiyaning NATOga qo‘shilishini tezlashtirishi haqidagi to‘xtalgan edi.

Shuningdek, Shvetsiya hukumati mamlakatda musulmonlarning muqaddas kitobi – Qur’oni karimni tahqirlovchi xatti-harakatlarni taqiqlashga doir qonun loyihasini ishlab chiqqani xabar berilgan edi.