Pandemiya davrida turli davlatlar sog‘liqni saqlash tizimiga yuklamaning ortishi tufayli odamzodning bezgak tarqalishiga qarshi kurashishi qiyinlashib bormoqda, dedi «Microsoft» asoschisi Bill Geyts.

Uning ta’kidlashicha, bezgak chivinlari COVID-19 bilan bog‘liq yuzaga kelgan vaziyatda «tin olishgani yo‘q».

«Chivinlar ijtimoiy masofaga amal qilishmaydi, niqob ham taqishmaydi», — deb yozadi Geyts o‘zining blogida.

Tadbirkorning so‘zlariga ko‘ra, ko‘pgina mamlakatlarda bezgak bilan kasallanish avjiga chiqqanda COVID-19 kuchayadi.

«2014-yil G‘arbiy Afrikada Ebola tarqalgan vaqtda bezgak, sil, OIV/OITS kabi endemik kasalliklar Eboladan ko‘ra ko‘proq o‘limga olib kelgan. Negaki epidemiya mahalliy sog‘liqni saqlash tizimini izdan chiqargandi. Sog‘liqni saqlash tizimi vakillari COVID-19 bilan ham shunday bo‘lishi mumkinligidan xavotirda», — deyilgan uning maqolasida.

Geytsning aytishicha, pandemiya tufayli Afrikaning ko‘pgina hududlariga bezgakka qarshi to‘r, zarur dori-darmonlar va ekspress-testlar yetkazib berish bilan bog‘liq muammolar kelib chiqqan. JSSTning taxminicha, agar vaziyat tartibga solinmasa, Afrikaning Sahroi Kabirdan janubroqda joylashgan mamlakatlarida bezgakdan o‘lim darajasi 2000-yilgi ko‘rsatkichga yetadi. O‘shanda 764 ming kishi hayotdan ko‘z yumgandi.

«Insonlar hayotini saqlab qolishda COVID-19 bilan bezgak o‘rtasida hech qanday tanlov yo‘q. Dunyo bu mamlakatlarga ikkalasi bilan ham shug‘ullanishiga imkon berishi kerak», — deya ta’kidlagan u.