Amerika Qo‘shma Shtatlarining ayrim tijorat kompaniyalari suyultirilgan tabiiy gaz yetkazib berishni Yevropa energiya bozoridan Osiyo mintaqasiga yo‘naltirishni boshladilar. Bunga asosiy sabablardan biri sifatida Yevropa Ittifoqida yoqilg‘i narxining pasaygani ko‘rsatilmoqda.

Bu haqda «Kommersant» gazetasi Platts statistikasiga tayanib yozmoqda.

«Yanvar oyining 20 kunida AQShdan eksport qilingan suyultirilgan tabiiy gazning qariyb 64 foizi Yevropaga jo‘natilgan. Bu ko‘rsatkich 2022-yilning to‘rtinchi choragidagi o‘rtacha 70 foizni tashkil qilgan edi. Bu davrga kelib, mazkur mahsulotning Osiyo mintaqasiga eksporti to‘rtinchi chorakdagi 22 foizdan 29 foizga o‘sdi.

Agar Yevropa Ittifoqiga qishda o‘z omborlarini to‘ldirish uchun kutilganidan kamroq yoqilg‘i kerak bo‘lsa, bu tendensiya kuchayishi mumkin. Qo‘shma Shtatlar 2022-yilda mintaqaga eng yirik suyultirilgan gaz eksportchisiga aylanganiga qaramay, narxlarning keskin o‘zgarishi uzoq muddatli shartnomalar imzolashga imkon bermayapti.

Qo‘shma Shtatlar yoqilg‘i yetkazib berish yo‘nalishlarini bosqichma-bosqich o‘zgartirishining yana bir sababi koronavirus tarqalishi bilan bog‘liq cheklovlardan keyin Xitoy iqtisodiyotining tiklanishi va ishlab chiqarish sur’atlarining oshishi bo‘ldi. Umuman olganda, AQSh hozirda oyiga taxminan 8,6-8,8 milliard kub metr gaz eksport qilmoqda», – deyiladi xabarda.

19-yanvar kuni «Interfaks» Yevroittifoq o‘tgan yili 98 million tonna suyultirilgan gaz sotib olgani va dunyodagi eng yirik xaridorga aylangani haqida xabar bergan edi. Yevropa Ittifoqi bu ko‘rsatkich bo‘yicha Yaponiya (71,997 mln tonna) va Xitoy (63 mln tonna)ni quvib o‘tgan.