Kolumbiyaning Tunxa shahrida 104 yoshli Karmen Ernandes ikki marotaba koronavirus bilan kasallanib, sog‘ayib ketdi. Bu haqda Almaty TV xabar bermoqda.

 «Univision Noticias» xabariga ko‘ra, 5 aprel kuni senora Ernandes reanimatsiya bo‘limidan poliklinika shifokorlari olqishi ostida chiqarildi.

Karmen birinchi marta o‘tgan yili iyun oyida koronavirusni mag‘lub etgandi. O‘shanda bemor shifoxonaga yotqizilmagan. U oxirgi 25 yil davomida yashab kelayotgan San-Xose-de-Tunxa qariyalar uyidagi boshqa keksalar bilan birga izolyasiyaga olingan.

27-fevralda Ernandes COVID-19ga qarshi emlandi. 8-mart kuni esa uning PZR test tekshiruvi musbat chiqdi. Shifokorlarning izohlashicha, vaksinatsiya bilan yuqtirish o‘rtasidagi qisqa fursat ichida immunitet rivojlanishga ulgurmagan.

19-mart kuni Karmen shifoxonaga yotqizilgan. Reanimatsiya bo‘limida u shifokorlarni hayratda qoldirdi. Chunki u nafas olish moslamasiga ehtiyoj sezmagan — o‘zi nafas olgan. Faqat goh-gohida kislorodli niqobdan foydalanadi.

Shifoxonadan chiqqandan so‘ng Karmen Ernandes qariyalar uyiga qaytdi. U Kolumbiyada COVID-19dan tuzalgan eng keksa fuqaro hisoblanadi.