Aloqa, axborotlashtirish va telekommunikatsiya xizmatlari sifatini yanada yaxshilashga doir chora-tadbirlar to‘g‘risidagi Hukumat qarori qabul qilindi. Bu haqda Adliya vazirligining «Huquqiy axborot» kanali xabar berdi.

Mazkur qaror bilan qonunchilik va boshqa normativ hujjatlar, davlat standartlari talablari hamda telekommunikatsiya texnologiyalari sohasida ko‘rsatilayotgan xizmatlar sifati buzilganligi uchun moliyaviy sanksiyalar (jarimalar)ni hisoblash tartibi to‘g‘risidagi nizom tasdiqlandi.

Moliyaviy sanksiyalar (jarimalar) Aloqa, axborotlashtirish va telekommunikatsiya texnologiyalari sohasida nazorat buyicha inspeksiya tomonidan xizmat ko‘rsatish sifati buzilganligi uchun ko‘rsatkichlarning yagona tizimi bo‘yicha hisoblanadi.

Masalan, endilikda mobil aloqa tarmog‘i uchun ma’lumotlar uzatish tezligining o‘rtacha qiymatiga rioya qilmaslik, har bir normativdan ortiq holat uchun eng kam ish haqining 10 foizi miqdorida moliyaviy sanksiya qo‘llanilishiga sabab bo‘ladi.