Telegram qoidalarini buzgan foydalanuvchilarining IP-manzillari va telefon raqamlari asosli so‘rovlarga javoban rasmiy organlarga berilishi mumkin, dedi messenjer asoschisi Pavel Durov o‘zining kanalida.

Durov avgust oyida Fransiyada hibsga olingan va mamlakatdan chiqib ketish taqiqlangan. Fransiya ommaviy axborot vositalarining ta’kidlashicha, Telegram Durov hibsga olinganidan keyin Fransiyadagi tergovchilarning so‘rovlariga javob bera boshlagan.

Durov yozganidek, messenjer o‘zining xizmat ko‘rsatish shartlari va maxfiylik siyosatini yangilab, «butun dunyo bo‘ylab ularning bir xilligini ta’minladi».

«Biz qoidalarimizni buzganlarning IP manzillari va telefon raqamlari qonuniy talablarga javoban tegishli organlarga oshkor etilishi mumkinligini aniq aytdik», dedi Durov.

U Telegramning qidiruv funksiyasidan ayrim shaxslar xizmat ko‘rsatish shartlarini buzgan holda noqonuniy tovarlarni sotish uchun foydalanayotganini tan oldi. Durovning ta’kidlashicha, so‘nggi bir necha hafta ichida «maxsus moderatorlar jamoasi» Telegramda qidiruvni xavfsizroq qilib qo‘ygan va barcha aniqlangan «muammoli kontent»ga kirish imkoni yo‘q.

«Bu chora-tadbirlar jinoyatchilarning oldini olishi kerak. Telegramda qidiruv noqonuniy mahsulotlarni targ‘ib qilish uchun emas, balki do‘stlar va yangiliklarni topish uchun mo‘ljallangan. Biz tajovuzkorlarga deyarli bir milliard foydalanuvchi uchun platformamizning yaxlitligini xavf ostiga qo‘yishiga yo‘l qo‘ymaymiz», — deya xulosa qildi Telegram asoschisi.

6 sentyabr kuni Durov hibsga olinganidan so‘ng o‘zining birinchi postini yozdi va Fransiyada o‘ziga qo‘yilgan ayblovlarni rad etdi. Uning yozishicha, agar biror mamlakat messenjer xizmatidan norozi bo‘lsa, kompaniya rahbarini jinoiy javobgarlikka tortmasdan, uni sudga berishi kerak.