Vazirlar Mahkamasi 17.04.2021 yildagi «O‘zbektelekom» AK xalqaro paketli kommutatsiya markazining o‘tkazuvchanlik qobiliyatini kengaytirish» loyihasining Texnik-iqtisodiy asoslarining asosiy texnik-iqtisodiy parametrlarini tasdiqlash to‘g‘risida»gi 220-son qarorni qabul qildi.

Hujjat Prezidentning «Raqamli O‘zbekiston – 2030» strategiyasini tasdiqlash va uni samarali amalga oshirish chora-tadbirlari to‘g‘risida» 2020 yil 5 oktyabrdagi PF-6079-son Farmoniga muvofiq qabul qilingan.

 Qaror bilan:

a) «O‘zbektelekom» AK xalqaro paketli kommutatsiya markazining o‘tkazuvchanlik qobiliyatini kengaytirish» loyihasining texnik topshiriqlari bo‘yicha belgilangan tartibda o‘tkazilgan tanlov savdolari natijasiga ko‘ra «Winncom Technologies Corp» kompaniyasi (AQSh) g‘olib deb topilganligi;

b) loyihaning TIA bo‘yicha umumiy qiymati 25 920,4 ming AQSh dollariga, shundan investitsiya davridagi moliyaviy va boshqa xarajatlar uchun 5 973,4 ming AQSh dollariga hamda jami 19 947 ming AQSh dollariga teng quyidagi:

• «O‘zbektelekom» AK BNG va DPI qurilmalarining o‘tkazuvchanlik qobiliyatini kengaytirish uchun – 4 974,1 ming AQSh dollarilik;
• «O‘zbektelekom» AK ma’lumotlar uzatish tarmog‘ining o‘tkazuvchanlik qobiliyatini kengaytirish uchun - 4 990,7 ming AQSh dollarilik;
• «O‘zbektelekom» AK xalqaro paketli kommutatsiya markazini o‘tkazuvchanlik qobiliyatini kengaytirish uchun - 4 985,7 ming AQSh dollarilik;
• «O‘zbektelekom» AK ma’lumotlar uzatish yadro tarmog‘ida xizmatlar ko‘rsatishning o‘tkazuvchanlik qobiliyatini kengaytirish uchun - 4 996,5 ming AQSh dollarilik mashina va uskunalar xarid qilinishi ma’lumot uchun qabul qilindi.

Qaror bilan quyidagilar tasdiqlandi:

• «O‘zbektelekom» AK xalqaro paketli kommutatsiya markazining o‘tkazuvchanlik qobiliyatini kengaytirish» loyihasining texnik-iqtisodiy asoslarining asosiy texnik-iqtisodiy parametrlari;
• «O‘zbektelekom» AK xalqaro paketli kommutatsiya markazining o‘tkazuvchanlik qobiliyatini kengaytirish» loyihasi bo‘yicha AT «Aloqabank» kreditini qaytarish prognoz grafigi.

Quyidagilar umumiy qiymati 25 920,4 ming AQSh dollariga teng loyihani moliyalashtirish manbalari etib belgilandi:

• AT «Aloqabank»ning umumiy qiymati 19 947,0 ming AQSh dollari miqdoridagi krediti;
• «O‘zbektelekom» AKning 5 973,4 ming AQSh dollari miqdoridagi o‘z mablag‘lari.

Quyidagilar belgilab qo‘yildi:

• «O‘zbektelekom» AK AT «Aloqabank» kreditidan maqsadli va samarali foydalanish, loyihani amalga oshirish uchun mas’ul bo‘lgan ijro organi hisoblanadi;
• AT «Aloqabank» kreditini qaytarish bilan bog‘liq xarajatlar va unga hisoblangan foizlar «O‘zbektelekom» AKning o‘z mablag‘lari hisobidan amalga oshiriladi.

Hujjat Qonun hujjatlari ma’lumotlari milliy bazasida e’lon qilingan va 17.04.2021 yildan kuchga kirgan.