Yaponiya hukumati yapon tili hamda Kunchiqar o‘lka an’analari, madaniyatini o‘rganishga qiziquvchi o‘zbekistonlik yoshlarning bilim olish tashabbusini qo‘llab-quvvatlashda davom etadi. Bu haqda Yaponiyaning O‘zbekistondagi favqulodda va muxtor elchisi Takashi Hatori Toshkentda tashkil etilgan “Yaponiyada ta’lim va karera: kasbiy faoliyatni rivojlantirish imkoniyatlari” mavzusidagi anjumanda gapirdi.

Yaponiya elchixonasi tomonidan Yaponiya OTM bitiruvchilari klubi (UJUAC) bilan hamkorlikda tashkil etilgan tadbirda nutq so‘zlagan diplomat o‘zbekistonlik talabalarni faol o‘qish va muvaffaqiyatli karera qurishga undadi.

Anjumanda Yaponiya universitetlarini bitirib muvaffaqiyatga erishgan mutaxassislar o‘z tajribasi bilan o‘rtoqlashdi.

Ma’lumot o‘rnida, Yaponiya an’anaviy ravishda O‘zbekistonga ta’lim grantlari taqdim etib keladi.

Jumladan, Kunchiqar o‘lka hukumati dasturi doirasida 2024-yilda O‘zbekistonning 18 nafar yosh davlat xizmatchisi magistratura va 1 nafar yosh davlat xizmatchisi doktorantura bosqichida ta’lim olgan.

20 yildan ortiq vaqt mobaynida moliyalashtirilayotgan loyiha doirasida 400 ga yaqin O‘zbekiston vazirlik va idoralari vakillari Kunchiqar o‘lkaning nufuzli universitetlarida tahsil olgan. Ular magistrlik va doktorlik darajasi bilan vatanga qaytib, xalq xo‘jaligining turli tarmoqlarida faoliyat yuritmoqda.

Avval xabar berganimizdek, Yaponiya elchisi Takashi Hatori o‘zbekistonlik talabalarning yapon tilini bilish salohiyatiga yuqori baho bergandi.