2018-yilning 11-may sanasida ommaviy «Diktant.uz» — yozma savodxonlik bo‘yicha aksiya o‘tkaziladi. Bu haqda «Daryo» xabar berdi.

«Diktant.uz» aksiyasi — aholi o‘rtasida o‘zbek tiliga nisbatan hurmat hissini kuchaytirish, savodxonlikni barcha uchun umumiy normaga aylantirishga erishish, shuningdek, yoshlarning til madaniyati masalalarida ijtimoiy faolligini oshirish, yozma savodxonlik madaniyatini keng targ‘ib qilish, o‘zbek tiliga bo‘lgan hurmat va qiziqishni yanada oshirish hamda o‘zbek tili ta’limini takomillashtirishga qaratilgan ijtimoiy aksiya hisoblanadi.

Mazkur aksiyada ishtirok etish yoshi chegaralanmagan bo‘lib, unda o‘zbek tilida yozishni biladigan barcha xohlovchilar diktant yozish yo‘li orqali imlo savodxonligi bo‘yicha o‘z bilimlarini tekshirib ko‘rish imkoniyatiga ega bo‘ladi. Aksiya 2018-yilning 11-may kuni soat 15:00 da bir paytning o‘zida quyidagi manzillar bo‘yicha o‘tkaziladi:

• Toshkent davlat o‘zbek tili va adabiyoti universiteti
• O‘zbekiston davlat san’at va madaniyat instituti;
• Toshkent to‘qimachilik va yengil sanoat instituti;
• Nizomiy nomidagi Toshkent davlat pedagogika universiteti
• Toshkent davlat sharqshunoslik instituti
• Toshkent axborot texnologiyalari universiteti
• O‘zbekiston davlat jahon tillari universiteti
• Samarqand davlat universiteti
• Andijon davlat universiteti
• Qarshi davlat universiteti
• Termiz davlat universiteti

Aksiyada ishtirok etish istagida bo‘lgan xohlovchilar «Diktant.uz» saytida oldindan ro‘yxatdan o‘tishlari maqsadga muvofiq. Batafsil ma’lumotni veb-saytdan olish mumkin.

Ushbu aksiya Alisher Navoiy nomidagi Toshkent davlat o‘zbek tili va adabiyoti universiteti tashabbusi bilan Oliy va o‘rta maxsus ta’lim vazirligi, Axborot texnologiyalari va kommunikatsiyalarini rivojlantirish vazirligi huzuridagi «UzInfocom» Yagona integratori hamda O‘zbekistondagi bir qator universitet, institut, tashkilotlar hamkorligida o‘zbek tilining ijtimoiy mavqeyini yanada mustahkamlash, ajdodlardan avlodlarga o‘tib kelayotgan bebaho boylik — o‘zbek tilining vorislari sifatida ona tilini asrab-avaylash, uning nufuzini yanada oshirish maqsadida tashkil etilmoqda.