«Aftonbladet»da BMT rahbari Antoniu Guterrishning maqolasi chop etildi. Bosh kotib dunyo pandemiyadan faqat ikki yo‘l bilan chiqishi mumkinligini ta’kidladi.

Guterrish, kelajakni oldindan ko‘rib bo‘lmasligiga ishora qilgan holda, pandemiyadan keyingi dunyo qanday bo‘lishi ikki xil ssenariy rivojlanishiga bog‘liqligini aytdi: yaxshi va yomon.

«Yaxshi ssenariy»

Mamlakatlar hozirgi vaziyatdan chiqib keta olishni uddalashi, tiklanish bo‘yicha muvaffaqiyatli reja ishlab chiqilishi, rivojlanayotgan mamlakatlarga yetarlicha yordam berilishi jarayon «yaxshi ssenariy» bo‘yicha ketayotganini anglatadi.

Ayni shu yo‘nalishda ketilsa yaqin to‘qqiz oy ichida koronavirusga qarshi samarali va hammabop vaksina ishlab chiqilishida qo‘l kelgan bo‘lardi, dedi Bosh kotib.

«Shunday bo‘lgan taqdirda va iqtisodiyot muntazam tiklanib boraversa, biz kerakli yo‘nalishda harakatlanishni boshlaymiz, yaqin ikki-uch yil ichida oldingidek holatga qaytishimizga ishonsak bo‘ladi», — dedi Guterrish.

Biroq, ikkinchi — «yomon ssenariy» ham bor.

«Yomon ssenariy»

Mamlakatlar epidemiyaga qarshi birlashmasligi, virusning yangi-yangi o‘choqlari paydo bo‘laverishi, vaksina chiqishi kechikib ketishi yoki uni faqat «boy» mamlakatlar olishi — «yomon ssenariy».

«Bu yo‘sinda ketilsa segregatsiya (ayirmachilik), populizm va ksenofobiya (betoqatlik) o‘sishiga guvoh bo‘lamiz. Har bir mamlakat o‘z yo‘lidan ketadi yoki ayrim maqsadlar yo‘lida koalitsiyalarga bo‘linib oladi», — dedi Bosh kotib.

Guterrish umidsiz ssenariy ortidan besh-yetti yilga cho‘ziluvchi global inqirozni ko‘rmoqda.

Eng qiyini, dunyo qayoqqa ketayotganini hozir tushunish mushkul. Ammo birinchi ssenariy amalga oshishi uchun bor imkoniyatni ishga solish kerak, ikkinchi ssenariyga tadorikni ham unutmaslik zarur, deydi Guterrish.

Xalqaro mehnat tashkiloti bosh direktori Gay Rayder ma’lumot berishicha, 2020-yil o‘rtasiga kelib, koronavirus oqibatida jahonda 400 mln. kishi ishsiz qolgan — bu 2008-yilgi iqtisodiy inqiroz davridagidan o‘nlab karra ko‘pdir. Tashkilotning bugun boshlanib 9-iyulgacha davom etadigan sammitida ayni shu muammoga yechim qidiriladi.