O‘zbekiston tashqi ishlar vazirligi Yamandagi urush bo‘yicha bayonot berdi.

«O‘zbekiston Respublikasi Yamanda BMT vositachiligida ikki oylik sulh va o‘t ochishni to‘xtatish e’lon qilinganini olqishlaydi.

Harbiy harakatlarga vaqtinchalik moratoriy, shuningdek, ushbu mamlakatda qonuniylikni ta’minlash uchun ko‘rsatilgan qat’iyat Yamanda keng qamrovli tinchlik va barqarorlikni o‘rnatish yo‘lida murosaga erishish uchun zarur shart-sharoitlarni yaratadi deb hisoblaymiz.

Biz barcha kurashayotgan tomonlarni ixtilofni muloqot va diplomatik yo‘l bilan hal qilish uchun vazmin bo‘lishga va siyosiy iroda ko‘rsatishga chorlaymiz», deyiladi bayonotda.

Yaman sulhi

Yamandagi husiy isyonchilari va hukumat kuchlari o‘t ochishni to‘xtatishga kelishgandi. Ramazoni sharif munosabati bilan erishilgan sulh 2 oy davom etishini BMTning Yaman bo‘yicha maxsus vakili Hans Grundberg ma’lum qilgandi.

Qayd etilishicha, bir-biriga muxolif bo‘lgan ikki tomon havo, yer va dengizda hujum amaliyotlarini to‘xtatib turishga rozi bo‘lgan.

«Muvaqqat sulh bitimidan ko‘zlangan maqsad zulmu zo‘ravonlik domida qolgan yamanliklarga tin olmoq uchun imkon berish, mushkullarni oson qilish, eng asosiysi, ushbu ziddiyat barham topishiga umid uyg‘otishdan iboratdir», — dedi Hans Grundberg. 

BMT maxsus vakili, shuningdek, tomonlar o‘rtasida siyosiy muloqotni kuchaytirish orqali harbiy ziddiyatga butkul barham berish rejalashtirilayotganini ma’lum qilgan.

Muvaqqat bitim AQSh va Buyuk Britaniya tomonidan olqishlangan.

«Bu — muhim qadam, albatta, ammo hali yetarli emas. O‘t ochishni to‘xtatish bitimiga qat’iy rioya etilishi kerak. Avval ham ta’kidlaganimdek, ushbu urushga imkon qadar tezroq yakun yasamoq lozim», — degan AQSh prezidenti Jo Bayden.

Eron qo‘llab-quvvatlayotgan husiylar hamda Saudiya Arabistoni ko‘mak ko‘rsatayotgan hukumat kuchlari o‘rtasidagi harbiy ziddiyat 2014-yildan buyon davom etmoqda. O‘sha yili husiylar poytaxt Sana shahrini egallab, prezident Abd Rabbu Mansur Hodiyni hokimiyatdan chetlatgan edi. 2015-yil mart oyida esa Saudiya Arabiston va BAA boshchiligidagi harbiy koalitsiya Hodiy ma’muriyatini tiklash uchun amaliyot boshladi.

8 yillik qonli urush gumanitar inqirozga olib keldi. Harbiy to‘qnashuvlarda 150 ming kishi, jumladan, 14 500 nafar tinch aholi vakili halok bo‘ldi.  BMT Yamandagi gumanitar holatni juda og‘ir deb baholamoqda.