«Xorijda ota-onasi qaramog‘idan mahrum bo‘lgan O‘zbekiston fuqarolarining bolalarini O‘zbekistonga qaytarish tartibini takomillashtirish to‘g‘risida» Hukumat qarori (6-son, 07.01.2020-y.) qabul qilindi. Bu haqda «Huquqiy axborot» kanali xabar bermoqda.

Qarorga muvofiq:

• xorijda ota-onasi qaramog‘idan mahrum bo‘lgan bolalar O‘zbekistonga Ichki ishlar vazirligi tomonidan qaytariladi;
• 3 yoshgacha bo‘lgan bolalarni O‘zbekistonga qaytarish Sog‘liqni saqlash vazirligi bilan birgalikda tashkil etiladi;
• ushbu bolalarning shaxsini tasdiqlovchi hujjati bo‘lmaganda, ularning O‘zbekiston fuqaroligiga mansubligi O‘zbekistonning xorijdagi diplomatik vakolatxonalari va konsullik muassasalari tomonidan tasdiqlanadi.

Qaror bilan tasdiqlangan nizomda xorijda ota-onasi qaramog‘idan mahrum bo‘lgan bolalarni qaytarish tartibi belgilandi.

Nizomga ko‘ra, Ichki ishlar vazirligi, Tashqi ishlar vazirligi va Sog‘liqni saqlash vazirligi xorijda ota-onasi qaramog‘idan mahrum bo‘lgan bolalarni qaytarish bo‘yicha vakolatli organlar hisoblanadi.

Bu boradagi faoliyat Ichki ishlar vazirligining Huquqbuzarliklar profilaktikasi bosh boshqarmasi tomonidan muvofiqlashtirib boriladi.