Hozirgi kunda o‘zining yangicha ko‘rinishli loyihasi bilan tilga tushgan «Tashkent City» xalqaro ishbilarmonlar markazi qurilishi allaqachon boshlab yuborilgan. Ushbu loyiha bilan sobiq tadbirkor va hozirgi hokim Jahonggir Ortiqxo‘jayev shaxsan shug‘ullanmoqda. Bunyodkorlik yaxshi narsa.

Qurilish bor joyda buzilish bo‘ladi, albatta. Ayniqsa, shahar joyga bitilgan qismat shunday. Yangi narsa qurilishi uchun eskilari buziladi. Ammo eskini buzmay turib, yangini qurish ham yaramaydi. Shayxontohur tumani hokimligi ana shu naqldan sal bexabarroq shekilli. Tahririyatimizga aynan «Tashkent City» qurilishi boshlangan O‘qchi mahallasida yashovchi bir onaxon murojaat qildi. Aytishicha, qurilishning o‘rtasida uning uyi buzilmay qolib ketgan. Voqeani o‘rganish uchun yo‘lga chiqdik.

«Tashkent City» sababli ushbu hududda ko‘p binolar va uylar buzib tashlandi. Buzilgan uylarning sohiblariga yangilarini taqdim qilishdi. Hamma xursand, hamma rozi. Lekin Mag‘zuma Alimxo‘jayeva negadir norozi edi. Uning murojaatiga quloq tutdik (videoni ko‘ring).

Xullas, «Tashkent City» qurilishi boshlangach, buzilgan uylar egalariga yangilari berilgan. Bu tabiiy. Lekin bu onaxonniki haligacha buzilmagan, chunki unga uy berish rejada yo‘q hozircha. Kinoda aytadi-ku, «dakiment chataq». Hududiy komissiya mazkur uyga kelib, sharoit bilan tanishgan, uy sohiblari bilan gaplashgan, muammoni o‘rgangan. Biroq ikkinchi guruh nogironi hisoblanmish Mag‘zuma Alimxo‘jayeva katta hovlisining o‘rnini bosadigan uy so‘ragani uchun hozirgacha bu muammo hal etilmay kelinmoqda.

Tasavvur qiling, fevral oyidan beri bu yerda elektr energiyasi uzilgan, suv yo‘q, gaz o‘chgan. Atrofi buzilib, toraygan hovlida yashayotgan oila har kuni chang-to‘zondan nafas oladi, katta-katta mashinalar va boshqa qurilmalarning ovozidan uylar larzaga keladi, oynalar zirillaydi, xuddi lava o‘chog‘iga tushib qolganday...

Umid qilamizki, Toshkent shahar hokimligi, Shayxontohur tumani hokimligi va boshqa mutasaddi tashkilotlar mazkur muammoni vaqtida va ijobiy hal qiladi.

Voqealar rivojini kuzatib boramiz.