Turkiya ijodkorlari tomonidan namoyish etilayotgan «Poytaxt Abdulhamid» seriali csenariy muallifi serial ishini to‘xtatish uchun Isroil va Yevropa davlatlaridan bosimlar bo‘lganini ochiqladi, deb xabar berdi «Azon.uz».

Bu haqda shanba kuni Istanbulda «Arab jurnalistlar uyi» jamiyati tomonidan tashkil qilingan serialning arab tomoshabinlarga ta’siri haqidagi san’at forumida aytilgan.

Tadbirda serial ijodkorlaridan tashqari o‘nlab jurnalistlar va yozuvchilar ishtirok etishdi.

Forumda «Poytaxt Abdulhamid» seriali efirini to‘xtatish uchun bosimga duch kelgani ham aytib o‘tilgan. Chunki serial Turkiya va arab mintaqasi orasidagi aloqalarni mustahkamlaydi va bu ba’zilarga yoqmasligi tayin.

Shu nuqtai nazardan serial ssenariy muallifi Salmon Kayabash: «Yevropa parlamenti a’zolaridan biri serialni «fashistik» deb sifatlagan va uning namoyishini to‘xtatish kerakligini aytgan», - degan.

U so‘zi davomida Turkiyada eng ko‘p sotiladigan gazetalardan biri serialga qarshi maqola yozganini, shuningdek, Isroilning «Heartz» gazetasi ham shu kabi hamlani amalga oshirganini va bir qancha xalqaro gazetalar ham bunga ergashganini aytdi.

«Bizga qarshi o‘tkazilgan ushbu kampaniyadan keyin biz serialni yana-da professional tarzda ko‘rsatishga qaror qildik», — deb aytdi Kayabash.

«Tarixga nazar soladigan bo‘lsak, Yevropa kuchlari bizni bir-birimizdan ayirishga harakat qilgan. Suriya shimolidagi birodarlarimiz va shu yerdagi kurd birodarlarimizning oramizni buzish uchun hozirda katta hamla qilinmoqda. Ularga turk qurolli kuchlari yerlaringizni ishg‘ol qilish uchun kelgan degan fikr uqtirilmoqda. Bu arab birodarlarimiz bilan qilingan ssenariyning xuddi o‘zi», — dedi Kayabash.

Kayabash: «Biz Sulton Abdulhamid serialida haqiqiy tarixni ko‘rsatishga harakat qilyapmiz», — deb ochiqladi.

Serialda Mahmud poshsho rolini ijro etayotgan Hokan Boyav serialni to‘xtatish uchun bo‘layotgan bosimning sababini tushuntirib: «Mintaqamiz aholisi orasida umumiy mentalitet mavjud. Dushmanlarimiz bizni parchalab tashlashga harakat qilmoqdalar», — dedi.

Boyav oradagi kichkina ixtiloflarni tark etish zarurligini aytib: «Biz birgalikda harakat qilishimiz zarur. Chunki tariximiz bitta. Barchamiz bir yo‘lda yurgan yaxshi kishilarmiz», — dedi.

Nashrning eslatishicha, «Zo‘r TV» telekanali orqali ko‘rsatilayotgan «Poytaxt Abdulhamid» seriali namoyishi o‘tgan haftada texnik sabablarga ko‘ra to‘xtab qolgan.