19–21 iyun kunlari Toshkentdagi «Central Asian Expo» ko‘rgazmalar majmuasida ilk bor «Eco-Expo Central Asia 2025» ekologik texnologiyalar xalqaro ko‘rgazmasi bo‘lib o‘tadi. Ko‘rgazmada Turkiya, Xitoy, BAA, Yaponiya, Koreya Respublikasi, Saudiya Arabistoni, Germaniya va boshqa 25 dan ortiq davlatdan eksponentlar ishtirok etadi.

Xususan, dor yo‘llari qurish bo‘yicha dunyoning yetakchi kompaniyalaridan biri, Shveysariyaning «Bartholet Maschinenbau AG» kompaniyasi ham qatnashadi.

Kompaniya bosh direktori Markus Menzi mahalliy va xalqaro kompaniyalarni ko‘rgazmada qatnashib, hamkorlik o‘rnatishga chaqirdi.

«Eco-Expo Central Asia 2025» ko‘rgazmasida ishtirok etish biz uchun katta sharaf. Bu – biznes, hukumat va xalqaro hamkorlar sa’y-harakatlarini ekologik barqaror yechimlarni ilgari surish yo‘lida birlashtiruvchi muhim mintaqaviy platforma hisoblanadi.

Biz atmosferaga chiqariladigan zararli gazlarni kamaytiradigan, landshaftni asraydigan va tabiatga zarar yetkazmagan holda infratuzilma barpo etadigan transport tizimlarini ishlab chiqyapmiz. Loyihalarimizdan biri allaqachon O‘zbekistonda, Zomin tumanida amalga oshirildi. Yo‘l qurilishi tabiiy xususiyatlar va ekologik talablardan kelib chiqqan holda tashkil etildi.

«Bartholet» stendida jamoamiz bilan barqaror transport infratuzilmasi sohasida hamkorlik imkoniyatlarini muhokama qilishingiz mumkin bo‘ladi. Sizni «Eco-Expo Central Asia» ko‘rgazmasidagi stendimizga taklif qilaman. Keling, ekologik toza transport kelajagini birga quramiz», — deydi Markuz Menzi.

Ma’lumot uchun, «Bartholet Maschinenbau AG» osma yo‘llarni ishlab chiqaruvchi kompaniya bo‘lib, bosh ofisi Shveysariyaning Flums shahrida joylashgan. «Bartholet» dor yo‘llar, ko‘ngilochar bog‘lar, mashinasozlik hamda yoritish uskunalari sohalarida yetakchi xalqaro korxona hisoblanadi. 450 dan ortiq malakali xodimlar bilan zamonaviy infratuzilma mijozlar istaklariga mos ravishda kompleks loyihalarni tezkor va sifatli amalga oshirishni ta’minlaydi.

Kompaniya 60 yildan ortiq vaqt davomida tog‘li hududlarda va tobora ko‘proq shaharlarda dor yo‘llarni loyihalashtirib, qurib kelmoqda. Toshkent shahrida «Bartholet»ning qo‘shma korxonasi allaqachon faoliyatini boshlagan. Korxona nafaqat dor yo‘llari quradi, balki ularni tamirlash ishlari, ehtiyot qismlarini ishlab chiqarish va yetkazib berish kabi xizmatlarni ham qamrab oladi.

«Eco-Expo Central Asia 2025» ko‘rgazmasida kompaniya o‘zining eng so‘nggi texnikalari, yangi dor yo‘li smart kabinalari bilan ishtirok etadi. Ularning afzalligi o‘zgacha dizayn va kabina ichidagi sensor qurilmalaridir.