Bugun, 28-dekabr kuni O‘zbekiston Respublikasi Prezidenti Shavkat Mirziyoyevning Oliy Majlisga Murojaatnomasi bo‘lib o‘tmoqda.

Davlatimiz rahbari Murojaatnomasida soliq siyosati masalasiga e’tibor qaratdi.

«2019 yildan boshlab joriy etilayotgan yangi soliq konsepsiyasida soliq yukini kamaytirish, sodda va barqaror soliq tizimini qo‘llash va shu orqali iqtisodiyotimiz raqobatbardoshligini oshirish, tadbirkor va investorlar uchun yanada qulay muhit yaratish eng asosiy g‘oya bo‘ladi», dedi Prezident.

Shuningdek, yangi tahrirdagi Soliq kodeksida mamlakat taraqqiyotining tayanchi bo‘lgan insofli, halol soliq to‘lovchilarni rag‘batlantirish, yashirin faoliyat yuritayotganlarni esa qat’iy jazolash ko‘zda tutilishi aytib o‘tildi.

Prezident soliq siyosatidagi imtiyozlarga ham to‘xtalib o‘tdi.

«Soliq imtiyozlarini bosqichma-bosqich bekor qilishimiz kerak. Kelajakda hammaga bir xil sharoit bo‘ladi. Kimgadir preferensiya yoki imtiyozlar berilsa, bu boshqalar uchun adolatsizlik bo‘ladi. Shuning uchun hammaga bir xil bo‘lishi kerak, bozor beshafqat, lekin shuni qilishimiz kerak», dedi Shavkat Mirziyoyev.