O‘zbekiston musulmonlari idorasi huzuridagi Fatvo markazi Ramazon hayiti kuni atrofidagi xabarlarga munosabat bildirildi.

Ayni kunlarda internet saytlari va ijtimoiy tarmoqlarda Ramazon hayiti kunini belgilash atrofidagi ma’lumotlar turlicha talqin etilmoqda. Avval xabar berganimizdek,  O‘zbekiston musulmonlari idorasida Ramazon oyi va hayitini aniqlash uchun Ishchi guruh shug‘ullanmoqda.

Ulamolar va malakali mutaxassislardan iborat mazkur ishchi guruh Ramazon hayiti kuni – yangi Shavvol hilolini astronomik tahlillar hamda xorijiy davlatlardagi mutaxassislar bilan hamkorlikda kuzatib bormoqda. Hatto Ishchi guruhi vakillari AQSh, Turkiya, Janubiy Koreya va Rossiya mintaqalarida ham kuzatish ishlarini olib bormoqda.

Xorijdagi nufuzli astronomiya markazlari va O‘zbekiston Respublikasi Fanlar akademiyasi qoshidagi Astranomiya institutidan olingan ma’lumotlarga ko‘ra, 2023 yil Ramazon hayiti kuni, ya’ni Shavvolning yangi oy fazasi shu yil 20  aprel, payshanba kuni Toshkent vaqti bilan soat 09:12 da, Saudiya Arabistoni vaqti bilan esa 07:12 da sodir bo‘ladi. Astranom olimlar xulosasiga ko‘ra, shu kuni Shavvol oyi hiloli O‘zbekiston hududida ko‘rinmasada, lekin dunyoning ayrim mintaqalarida ko‘rish mumkin bo‘ladi.

Ta’kidlash joizki, Hanafiy fiqhi manbalarida bir makonda yangi hilol ko‘rilishi dunyodagi jami musulmonlarga Ramazon hayitini nishonlashni joiz qiladi. Bunga hanafiy, molikiy va hanbaliy mazhablaridan iborat jumhur ulamolar ittifoq qilishgan.

Shar’iy masalalar va astronomik hisob-kitoblarga tayangan holda 1444 hijriy yil Shavvol oyi hiloli milodiy 2023 yil 20 aprel kuni Yer yuzining ayrim hududlarda kuzatiladi. Shu bois, Ramazon hayiti kuni 2023 yil 21 aprel, juma kuniga to‘g‘ri kelishi haqida dastlabki xulosalar qilinmoqda. Aytish mumkinki, AQSh, Turkiya, Qozog‘iston, Qirg‘iziston, Tojikiston, Turkmaniston kabi bir qator davlatlar tomonidan joriy yil 21 aprel, juma kunini Ramazon hayiti, deb e’lon qilindi.

Falakiy hisob bo‘yicha hayit kuni ma’lum bo‘lsa-da, Hazrati Payg‘ambarimiz sollallohu alayhi vasallamning «Yangi oyni ko‘rib ro‘za tutinglar va yangi oyni ko‘rib hayit qilinglar», degan hadisi shariflariga asosan mazkur Ishchi guruhining AQSh, Turkiya va G‘arb davlatlardagi vakillarining hilolni kuzatish to‘g‘risidagi oxirgi ma’lumotlari olingandan keyin 2023 yil 20 aprel kuni yakuniy xulosalar taqdim etiladi, insha Alloh.

Qayd etish kerakki, ibodat masalasida doim ehtiyot bo‘lish lozim. Ramazon ro‘zasining boshlanishi va tugashi faqat yurt muftiysi tomonidan e’lon qilinadi, mo‘min-musulmonlar esa shu fatvoga ergashishlari shart bo‘ladi.

Demak, internet saytlari yurituvchilari va ijtimoiy tarmoqlar foydalanuvchilaridan ushbu masalada turli xabarlarni tarqatish orqali xalqimizni asl vaziyatdan chalg‘itmaslikni iltimos qilamiz.

Shu kunlarda O‘zbekistonda Ramazon hayiti kuni rasmiy manbalarda e’lon qilinadi, deyiladi munosabatda.