«Disney» studiyasi «Qirol sher»ning kino talqinini suratga olishini e’lon qilgach, remeyklarni xushlamaydiganlar qay ahvolga tushganini tasavvur qilish qiyinmas. Ammo 1994 yilgi afsonaviy «Qirol sher» multfilmining o‘zi ham plagiat ekanini hammayam bilavermasa kerak.

Rasman «Qirol sher»da mualliflik huquqlari qonuniy va hammasi risoladagidek. Multfilmda bo‘lg‘usi qirol — shervachcha Simba o‘z urug‘i sha’nini tiklab, boy berilgan hokimiyatni qaytarib olgani haqida hikoya qilinadi. Voqealar jarayoni shundayki, go‘yo Shekspir dramalariga tushib qolgandek bo‘lasiz — «Qirol sher» mualliflari ham «Hamlet»dan ilhomlanishganini ochiq aytishgandi.

Multfilm shunchalik zo‘r chiqdiki (prokatdan 968 million dollar ishlash — 1994 yil uchun favqulodda hodisa), hatto uni «ko‘rishi kerak bo‘lmagan» odamlar ham ko‘rishdi. Bular «Junglilar imperatori» (inglizchaga o‘girilganda «Oq sher Kimba»!) yapon animesining fanatlari edi.

O‘xshashlik faqat Kimba va Simbada bo‘lsa qo‘l siltab ketilaverardi. Ammo fanatlar syujetdagi juda ko‘p o‘xshashliklarni topishdi, hatto ayrim sahna detallarini «Disney» shundoqqina yaponlardan ko‘chirib olgan. Ulg‘aygan Simbaga ovoz bergan aktyor Metyu Broderik o‘zini «Kimba»ning amerikancha remeykida qatnashishga yollashgan deb o‘ylagan ekan. Chunki u ham bungacha yapon animesi bilan yaxshi tanish edi.

Ko‘chirmakashlik yuzaga qalqigach barcha rejissyorlar va ssenariynavislar bir ovozdan: «Biz hech qachon yapon multfilmini ko‘rmaganmiz, uni birinchi eshitishimiz», — deb oyoq tirab olishdi.

Internetni qidirsangiz «Qirol sher» va «Oq sher Kimba»ning nechog‘liq o‘xshashligi haqidagi sanoqsiz roliklarni topasiz.

Hozir esa 2019 yilda chiqajak «Qirol sher» kinosi hammaning og‘zida: «Chorak asr oldingi multfilmdan o‘zisharmikin yo buzisharmikin bular».

Xullas, kutamiz Qirol sherni!