Vazirlar Mahkamasining 2020-yil 18-apreldagi qaroriga ko‘ra, Toshkent viloyatida qurilish va obodonlashtirish ishlarini yanada jadallashtirish, to‘g‘ridan-to‘g‘ri xorijiy investitsiyalar hisobiga chet el investorlari uchun shart-sharoitlarga ega bo‘lgan zamonaviy shaharcha tashkil etish belgilangan.

Mazkur hujjatda qayd etilishicha, «Super Garden» mas’uliyati cheklangan jamiyatiga Qibray tumani «Tuzel» qishloq fuqarolar yig‘ini hududidan shaharsozlikning eng so‘nggi me’yorlari asosida ana shunday shaharcha barpo etish uchun yer ajratildi. «Invest Village» investitsiya loyihasi deb nomlanadigan mazkur ob’yekt «Super Garden» mas’uliyati cheklangan jamiyati tomonidan bunyod etiladi. Loyiha tashabbuskorlarining ta’kidlashicha, dov-daraxtlar o‘rtasida bunyod etiladigan shaharcha asosan ikki qavatli kottejlardan iborat bo‘ladi.

Shuningdek, bu yerda aholi uchun turli tadbirlar o‘tkaziladigan guzar tipidagi ixcham marosimlar saroyi, sport majmuasi, tennis korti va qator xizmat ko‘rsatish shoxobchalari bo‘ladi. Istiqomat qiluvchilarning mazmunli hordiq chiqarishi uchun xiyobonlar qurish ham ko‘zda tutilgan. Bunday qulayliklar tabiiyki, o‘ziga xos mikroiqlim yaratishga xizmat qiladi.

Loyihaga muvofiq, zamonaviy shaharcha 2021-yilning yakunida qurib bitkaziladi. Unga Turkiyaning «Toleza Tekstil Sanayı lç ve Diş Tic. Ltd. Ști.» kompaniyasi tomonidan 20 million AQSh dollari miqdorida to‘g‘ridan-to‘g‘ri xorijiy investitsiya kiritilib, hamkorlikda barpo etiladi. «Super Garden» MChJ tomonidan esa 5 mill. AQSh dollari miqdoridagi mablag‘ ajratiladi. Pirovardida 100 yangi ish o‘rinlari yaratiladi.

Toshkent viloyati hokimligi esa «Super Garden» MChJga ajratilgan yer uchastkasida xorijiy investitsiya hisobiga «Invest Village» loyihasini amalga oshirish uchun yer uchastkasi toifasini aholi punktlarining yerlari toifasiga o‘zgartirish bo‘yicha tegishli qaror qabul qiladi.

Investitsiya loyihasini amalga oshirish doirasida quriladigan uy-joylarning 5 foizi Toshkent viloyati hokimligiga beriladi. Shu bilan birga, Toshkent viloyati hokimligiga «Toleza Tekstil Sanayı lç ve Diş Tic. Ltd. Ști.» kompaniyasi hamda «Super Garden» MChJ tomonidan amalga oshiriladigan investitsiya loyihasini belgilangan muddatda foydalanishga topshirilishi bo‘yicha tizimli monitoring olib borish vazifasi ham yuklatilgan.