AQSh prezidenti Donald Tramp bilan ikki soatcha telefonda muloqot qilganidan so‘ng, Rossiya prezidenti Vladimir Putin jurnalistlarga suhbat tafsilotlarini so‘zlab bergandi.

Endi esa Donald Trampning ushbu suhbatdan keyingi bayonotlarini keltiramiz:

• O‘ylashimcha, tez orada nimadir sodir bo‘ladi. Bu urushga katta ego egalari aralashgan. Agar hech narsa yuz bermasa, biz ortga chekinamiz.
• Ukraina masalasida jiddiy siljish kuzatilmasa, AQSh muvofiqlashtiruvchi rolini Yevropaga topshiradi.
• Ukrainadagi urush Yevropaning muammosi edi, AQSh bekor aralashdi.
• Menimcha, Putining joniga tegdi. Putin to‘xtashni istaydi, deb o‘ylayman.
• Miyamda Rossiya-Ukrainaga bosim qilishdan to‘xtashimni ko‘rsatuvchi qizil chiziq bor. Ammo u qanaqa qizil chiziqligini aytmayman.
• Ukrainani qurol bilan ta’minlash rejamiz yo‘q emas, biroq urush to‘xtashiga ishonamiz.
• Tinchlikka erishish uchun imkoniyat bor, shu sababli Rossiyaga qarshi sanksiyalarni kuchaytirmayapmiz.
• Amerika askari Ukrainaga bormaydi.
• Zelenskiy bilan «muloqot qilish uncha oson emas».
• AQSh Ukrainaga «xorijiy davlat uchun rekord miqdordagi mablag‘»ni berdi.
• Ukrainaning nizoni bas qilish va tinchlikka erishish uchun xatti-harakatlari yetarlichami, 2-4 haftadan so‘ng bir nima deyish mumkin.