28-dekabr Bangladesh transport sohasi tarixiga kirdi — poytaxt Dakkada ilk metro ishga tushdi. Bu haqda UCA News xabar berdi.

Nashr yozishicha, mahalliy hukumat megapolis taraqqiyotini sekinlashtirayotgan yo‘llardagi tiqinlarga barham berish ustida ishlamoqda.

Dakka jahonning eng aholisi ko‘p shaharlaridan hisoblanadi. Bu yerda yashovchi 22 mln aholi uchun har kuni avtomobillar bilan to‘lib-toshgan yo‘lga otlanish — «it azobi».

Solishtirish uchun: Dakkada butun Qozog‘iston va Toshkent shahridagiga teng aholi yashaydi. Bangladesh hududi (148 460 kv. km.) O‘zbekistonnikidan 3 baravar kichik, aholisi 4,6 baravar ko‘p (166,3 mln).    

Har yili Dakka iqtisodiyoti yo‘llardagi «probka»lar oqibatida yo‘qotilgan ish vaqtidan $3 milliarddan ziyod ziyon ko‘radi.

Dakkadagi ilk metro tarmog‘i so‘nggi o‘n yil davomida qurildi.

Dakkaning markazini va chekka tumanini tutashtiruvchi ilk metro tarmog‘i 28-dekabrdan ishga tushdi. Loyiha uchun Bangladesh g‘aznasidan $2,8 mlrd sarflandi.

2030-yilda metro butun shaharni qamrab oladi, stansiyalari soni 100 tadan oshadi.