Bugun Madaniyat vaziri Ozodbek Nazarbekov «Buxoro – 2020-yilda islom olami madaniyati poytaxti» tadbirlariga tayyorgarlik ko‘rish maqsadida AYSESKO delegatsiyasi tarkibi – Rixiati Salix Najib (AYSESKO Bosh direktori o‘rinbosari, Madaniyat yo‘nalishi boshlig‘i), Benarafa Abdel Illax (direktor maslahatchisi), Chebbi Bilal (Madaniyat dasturi mutaxassisi)lar bilan uchrashdi.

Vazirlik tomonidan iliq qarshi olingan mehmonlar dastlab Buxoro haqidagi taassurotlari bilan o‘rtoqlashdilar.

«Buxoroda bo‘lib o‘tadigan tadbirlarda AYSESKO bilan hamkorlik qilishdan mamnunmiz, – deydi o‘z o‘rnida Madaniyat vaziri Ozodbek Nazarbekov ham. – Bu islom sivilizatsiyasiga hissa qo‘shgan makon sifatida to‘g‘ri tanlov deb o‘ylayman. Faxrlanib aytamanki, O‘zbekistonning har bir hududida islom taraqqiyotiga xizmati singgan ajdodlarimiz bor. Bu kabi tadbirlar keyingi Xalqaro anjumanlarga yo‘l ochadi».

Shuningdek, vazir mavjud muammolarga to‘xtalishni ham joiz bildi.

«Madaniyat vaziri sifatida ba’zi masalalar meni qoniqtirmaydi, – deydi u kuyunib. – Masalan, butun dunyo bo‘yicha bir yarim milliarddan ortiq musulmonlar bor. Biroq ularning bir foizi ham Bahouddin Naqshband va Imom al-Buxoriy ziyoratiga kelmaydi.

Menimcha, bu bizning aybimiz. Chunki media materiallarning tayyorlanishi juda sust yoki sifatsiz. Misol uchun, Islom taraqqiyotiga ulkan hissa qo‘shgan allomalarimizning bolaliklari haqida multfilmlar yaratilmagan. Yana yosh avlod vakillari uchun hech qanday kinofilmlarning yo‘qligi ham meni tashvishga soladi. Bu kabi masalalar nafaqat O‘zbekiston, balki Islom tashkilotlarining ham zimmasidagi mas’uliyat deb o‘ylayman».

Bu takliflardan ta’sirlangan mehmonlar ham fikrlari bir joydan chiqqanidan xursand ekanliklarini bildirishdi.

«Sizning taklifingiz va kelajakni ko‘ra olishingiz, masalaga yondoshuvingiz tashkilotimiz bosh direktori bilan juda o‘xshash ekan» – dedi AYSESKO Bosh direktori o‘rinbosari Rixiati Salix Najib. – Direktorimiz tashkilot nomini Islom olami markazi deb e’lon qilgani ortidan bugungi kunda islomiy bo‘lmagan davlatlar ham tashkilotimizga a’zo. U orqali ko‘plab musulmonlarning Buxoroga tashrif buyurishiga zamin yarata olamiz va bu albatta o‘z natijasini beradi».

Uchrashuvda har ikki tomon takliflari tinglandi. Madaniyat vazirligi hamda AYSESKO Xalqaro tashkiloti o‘rtasida doimiy hamkorlikni yo‘lga qo‘yish kelishib olindi.