2018 yil 28 mart kuni Toshkent shahridagi Inha universiteti (IUT)da «Oracle Academy»ning ochilish marosimi bo‘lib o‘tdi. Bu haqda IUT rasmiy saytida xabar berildi.

«Oracle Academy»ni IUT birinchi prorektori Cho Vu Sug va akademiyaning EMEA mintaqasi bo‘yicha rahbari Deni Guris ochishdi.

«Oracle Academy» — bu «Oracle» kompaniyasi tomonidan tashkil qilingan. U o‘qituvchilarning malaka oshirishi hamda maktablarda, kollejlar va universitetlarda talabalar uchun axborot texnologiyalarini uzluksiz o‘rganish uchun barcha zarur resurslarni taqdim etish maqsadida tashkil etilgan ta’lim tashabbusi hisoblanadi.

Har yili «Oracle Academy» kurslarida 120 mamlakatdagi 3,5 million nafardan ortiq talabalar o‘qiydi. Akademiya dasturlari yoshlarga real hayotga tayyorgarlik ko‘rish va zamonaviy global iqtisodiy sharoitlarda ishlab ketishiga yordam beradi. 

Bu yerda eng mashhur akademik kurslar — Java Fundamentals, Java Foundations, Java Programming, Database Foundations, Database Design and Programming With SQL, Programming with PL/SQL, APEX – Application Development Foundations va shu kabilar bo‘yicha bepul ta’lim olish mumkin. Ular orasida ma’ruza va mustaqil o‘qish, amaliy mashg‘ulotlar, bilimlarni nazorat qilish, kurs loyihasini ishlab chiqish va amalga oshirish kiradi.

Har bir keyingi kurs oldingisining mantiqiy davomi (Fundamentals, Foundations, Programming) va uni o‘rganishni boshlash uchun AT sohasidagi chuqur bilimlarga ega bo‘lish shart emas. Kurslarning davomiyligi 90-180 soatni tashkil etadi. Kurslar akademik dasturga kiritilishi mumkin, ular aniq ilmiy maqsadlarni o‘z ichiga oladi va ko‘plab amaldagi xalqaro standartlar va sinovlarga javob beradi.

— «Oracle» kompaniyasi Toshkent shahridagi Inha universitetida o‘z akademiyasini ochganidan xursandmiz, — dedi IUT rektori Sarvar Babaxodjayev. — «Oracle Academy» kurslari yoshlarga kareralarini qurishlari uchun o‘zlarining malaka va ko‘nikmalarini oshirishga yordam berishiga ishonchimiz komil.

«Oracle Academy»ning ochilish marosimi doirasida universitetda «Oracle Academy Student Day»  tadbiri ham bo‘lib o‘tdi.