11-avgust kuni amal qiladigan dollar kursi 400 so‘mdan ko‘proqqa oshgani aytilmoqda.

Jumladan, ayrim tijorat banklarida sotuv kursi 12 135 so‘mga yetgan. Xarid narxi esa 11 650 so‘m ko‘rsatilyapti.

Ayrim manbalar banklarning mobil ilovalaridan AQSh dollari ayirboshlash ham to‘xtatilganini yozmoqda.

Markaziy bank o‘z navbatida ichki valyuta bozoridagi holat bo‘yicha tushuntirish berdi.

«Asosiy savdo-hamkor davlatlar milliy valyutalarining sezilarli qadrsizlanishi tashqi savdo va pul o‘tkazmalari kanali orqali so‘mning real samarali almashuv kursining mustahkamlanishiga olib keldi.

Bu, o‘z navbatida, eksport va pul o‘tkazmalari tushumlari kanallari orqali mamlakatimizga valyuta tushumlariga va ichki valyuta bozoridagi taklif hajmiga salbiy ta’sir ko‘rsatdi.

Natijada, ichki valyuta bozorida so‘m almashuv kursi devalvatsiyasi sur’atining biroz tezlashishi – fundamental omillar ta’sirida to‘g‘rilanishi kuzatildi.

Markaziy bank kelgusida almashuv kursining keskin qadrsizlanishini oldini olish bo‘yicha yetarli instrumentlarga ega bo‘lib, zarur hollarda qo‘shimcha intervensiyalar amalga oshirish orqali tebranishlar yumshatib boriladi.

Mazkur to‘g‘rilanish real samarali almashuv kursning uzoq muddatli trendiga qaytishiga olib keladi va muvozanatli kurs valyuta tushumlarini oshirish orqali bozorda taklif o‘sishiga xizmat qiladi. Real samarali almashuv kursi yil oxirigacha va o‘rta muddatli istiqbolda nisbatan barqaror bo‘ladi», – deyiladi rasmiy izohda.