«O‘g‘lim maktabda o‘qiydi. Uni nazorat qilish uchun mobil telefon olib berganman. O‘qituvchisi o‘g‘limning telefonini olib qo‘yibdi. Bunday qilishga uning haqqi bormi?».

Vazirlar Mahkamasining 2012-yil 21-maydagi 139-son qarori bilan O‘zbekiston Respublikasi ta’lim muassasalarida mobil telefonlardan foydalanish tartibi to‘g‘risidagi nizom tasdiqlangan bo‘lib, ta’lim muassasalarida o‘tkaziladigan o‘quv mashg‘ulotlari va tadbirlar boshlanishidan oldin ta’lim oluvchilar telefonini o‘chirib qo‘yishi hamda sumkasiga solib qo‘yishi shart.

Ta’lim oluvchilarga quyidagilar qat’iyan taqiqlanadi:

a) telefonini bo‘yniga osib olish, ko‘krak cho‘ntaklarida, shim, yubkalari cho‘ntaklarida va shu kabilarda saqlash;

b) telefon akkumulyatorini zaryadlash uchun ta’lim muassasasi elektr tarmoqlariga ulash;

v) telefoni yordamida:

— atrofdagilarga zo‘ravonlik, shafqatsizlik, pornografiyani targ‘ib qiluvchi video va suratlarni namoyish qilish;

— ta’lim muassasasining nufuziga, shu jumladan, zo‘ravonlik va vandalizm holatlarini suratga olish va keyinchalik ularni atrofdagilarga namoyish etish yo‘li bilan zarar yetkazish;

g) o‘quv mashg‘ulotlari vaqtida:

— telefon orqali so‘zlashish hamda SMS (MMS) va boshqa turdagi xabarlarni jo‘natish;

— telefonni stol ustiga qo‘yish;

— musiqa tinglash;

— surat va video tasvirlarni ko‘rsatishda telefondan foydalanish, tasvir ko‘rish, diktofon, kalkulyator, kalendar, bloknot, yon daftarcha kabilar sifatida foydalanish;

— suratga olish va video tasvirga tushirish;

— telefon orqali boshqa xizmatlardan foydalanish.

Ta’lim muassasasida ta’lim oluvchilarga mashg‘ulotlar va tadbirlar oralig‘ida faqat asosli va kechiktirib bo‘lmaydigan zarur holatlarda ota-onasi (ularning o‘rnini bosuvchilar), yaqin qarindoshlari, ta’lim muassasalarining rahbarlari yoki xodimlari bilan zudlik bilan bog‘lanish maqsadida telefonlardan foydalanishga ruxsat etiladi.

Ushbu nizom talablari buzilgan taqdirda ta’lim muassasasining har qanday pedagog xodimi ta’lim oluvchidan telefonni olib qo‘yish, bildirishnoma rasmiylashtirish va uni telefon bilan birga ta’lim muassasasining direktoriga yoki direktor o‘rinbosariga, keyinchalik uni ota-onalarga berish huquqiga ega.

Demak, Sizning o‘g‘lingiz ta’lim muassasasida mobil telefondan foydalanish tartibini buzgan taqdirda, o‘qituvchi uning telefonini muassasa rahbariyatiga yoki Sizga berish sharti bilan olib qo‘yishi mumkin.