O‘zbekiston olimpiya terma jamoasi «Chig‘atoy» sport majmuasida o‘quv-mashg‘ulot yig‘iniga kirishgan. Ayni vaqtda jamoa Osiyo chempionati saralashi doirasida Hindiston va Tojikistonga qarshi kechadigan o‘yinlarga tayyorgarlik olib bormoqda. Bu haqda Milliy Olimpiya qo‘mitasi matbuot xizmati xabar berib o‘tdi. 

Lyubinko Drulovich boshchiligidagi futbolchilar 22-26 mart kunlari Toshkentda bo‘lib o‘tadigan Osiyo chempionati saralashiga tayyorgarlik ko‘rishmoqda. Bugun Olimpiya terma jamoasi a’zolari yig‘in doirasida «Bunyodkor»ga qarshi nazorat o‘yini o‘tkazishadi.

Uchrashuv soat 16:30da «Milliy» stadion mashg‘ulotlar maydonida o‘tkaziladi.

Eslatib o‘tamiz, Toshkentda o‘tadigan Osiyo chempionati saralashida O‘zbekiston olimpiya terma jamoasi Tojikiston va Hindiston terma jamoalari bilan kuch sinashadi.

Saralash o‘yinlarining taqvimi quyidagicha:
22 mart, 17:00
O‘zbekiston – Hindiston («Paxtakor» stadioni)
24 mart, 17:00
Tojikiston – Hindiston («Paxtakor» stadioni)
26 mart, 17:00
O‘zbekiston – Tojikiston («Paxtakor» stadioni)