AOKAda Ichki ishlar vazirligi JXD axborot xizmati rahbari Muzifa Sultonova ishtirokida o‘tkazilgan brifingda bayram tadbirlari davomida jamoat tartibini saqlash va xavfsizlikni ta’minlash borasida amalga oshirilayotgan ishlar haqida ma’lumot berildi:

Joriy yilgi Mustaqillik bayrami tadbirlari Respublikaning 213 ta joyida 23-31 avgust kunlari o‘tkazilishi begilangan bo‘lib, unda jamoat tartibini saqlash va xavfsizlikni ta’minlash uchun 16 832 nafar ichki ishlar organlari, 4 677 nafar Milliy gvardiya, 1 943 nafar Favqulodda vaziyatlar vazirligi xodimlari va harbiy xizmatchilari hamda 7 244 nafar jamoatchilik vakillari jalb etilgan.

Shuningdek, xodimlarga xizmatda foydalanish uchun 3 037 ta metallodetektor, 1 587 ta avtotransport, 7 881 ta aloqa vositalari va 267 bosh xizmat itlari ajratilgan.

«Bayram tadbirlari o‘tkaziladigan ob’yektlarda 2 107 ta videokuzatuv kameralari o‘rnatilib, shundan 452 tasi hududiy ichki ishlar organlariga integratsiya qilindi hamda onlayn nazorat o‘rnatildi.

Tadbir ob’yektlariga fuqarolarni olib borish uchun 440 ta transport vositalari ajratildi», – deydi IIV JXD axborot xizmati rahbari Muzifa Sultonova.

Shuningdek, barcha ob’yektlar va ularning atrof-hududlarida yo‘l harakati xavfsizligini ta’minlash, avtomashinalar harakatini tartibga solish maqsadida 1 964 nafar YPX xodimlari xizmatga jalb etildi.