AQShning Ogayo shtatida otasi bir yil oldin vafot etgan go‘dak dunyoga keldi, deya xabar berdi «Daily Mail».

Ta’kidlanishicha, yangi tug‘ilgan chaqaloqning onasi Juli Uilson 2007-yilda bo‘lg‘usi turmush o‘rtog‘i Trevis bilan tanishgan. 2012-yilda unga turmushga chiqqan. Ayolning sog‘lig‘i bilan bog‘liq muammolar tufayli er-xotin farzandli bo‘la olishmagan. 2016-yilda Uilsonning bolasi o‘lik tug‘ilgan. Ko‘p o‘tmay erida bosh miya saratoni aniqlandi: afsuski, u oxirgi bosqichda edi.

Er-xotin tashxisdan xabardor bo‘lgach, ekstrakorporal urug‘lantirishni sinab ko‘rishga qaror qilishdi. 2019-yil fevral oyida oila rahbari vafot etdi. Amerikalik ayolga erining hayotlik paytida ikki marta embrionni o‘tkazishdi, biroq ular samara bermadi.

Eri vafot etganda ayolda beshta muzlatilgan embrion qoldi. U homilador bo‘lishga urinishni davom ettirishga ahd qildi. Chunki u va eri doimo bolali bo‘lishni orzu qilishgan. 2019-yil oktyabr oyida unga ikkita embrion o‘tkazishgandi, ular natija berdi. Ammo egizaklardan biri homiladorlikning 12-haftasida olamdan o‘tdi. Biroq 2020-yil 9-mayda Julining uzoq kutilgan qizi dunyoga keldi. Unga Logan deb ism qo‘yishdi.

Julining aytishicha, yangi tug‘ilgan qizaloq marhum otasiga juda o‘xshaydi.