Katta Farg‘ona kanalining Shahrixon tumanidan oqib o‘tgan qismidan topilgan mashina ichidan ikkita inson jasadi topildi.  Bosh prokuratura matbuot xizmatining «Xabar.uz»ga  ma’lum qilishicha,  jasadlar mahalliy fuqarolar - 25 yoshli yigit va 45 yashar ayol ekani aniqlangan.

Shu  yilning 31-iyul kuni Shahrixon tumani, Qayrag‘ochguzar mahallasida yashovchi fuqaro O.G‘. tuman IIB boshlig‘i nomiga ariza bilan murojaat qilib, bir hafta burun  turmush o‘rtog‘i  T.A. o‘zining boshqaruvidagi «Moskvich»da  qovun olib kelish  uchun  chiqib ketganicha daragi  bo‘lmaganini aytib, amaliy yordam so‘raydi. Ushbu holat bo‘yicha o‘sha kuniyoq  Shahrixon tuman prokurori tomonidan Jinoyat Kodeksining 97-moddasi 1-qismi bilan jinoyat ishi qo‘zg‘atilgan.

E’tiborlisi,  xuddi shu sanada tumanning Qorako‘rpa mahallasida istiqomat qiluvchi M.I. ham tuman IIBga ariza bilan murojaat qilib, U 45 yoshli onasi T.D. 23-iyul kuni kechga yaqin hech bir sababsiz  uyidan chiqib ketib, qaytib kelmaganini bildirgan.

Har ikki holat bo‘yicha  to‘plangan ish hujjatlari bitta jinoyat ishiga birlashtirilib, o‘tkazilgan tezkor-tergov harakatlari  natijasida  5-avgust kuni T.A. boshqaruvidagi avtomashina Katta Farg‘ona kanalining Shahrixon tumani, Begbachcha MFY o‘ramidan oqib o‘tgan qismidan topilgan.

Avtomashina ko‘zdan kechirilganida, uning ichida T.A. va T.D.ning jasadlari topildi. Marhumlarni ularning yaqinlari tanib olgan. Sud-tibbiy ekspertiza xulosasiga ko‘ra,  T.A. va T.D.ning tanasi hamda ichki a’zolarida suvda chirish alomatlari mavjudligi, o‘lim holati esa suvga cho‘kish natijasida kelib chiqanligi bayon qilingan», deyiladi Bosh prokuratura malumotnomasida.