Falastinning HAMAS harakati Siyosiy byurosi raisi Ismoil Haniya Turkiya prezidenti Rajab Toyyib Erdo‘g‘anga Falastin xalqini qo‘llab-quvvatlagani uchun minnatdorchilik bildirdi. Bu haqda u «Anadolu» agentligiga bergan eksklyuziv intervyusida ma’lum qildi.

«Prezident Erdo‘g‘onning Adolat va Taraqqiyot partiyasi (AK Parti) parlament fraksiyasi yig‘ilishida HAMASni milliy ozodlik harakati deb atagan va uni milliy kuchlar bilan qiyoslagan bayonoti, shubhasiz, biz va Falastin xalqi uchun g‘urur tuydiradi», – deydi Haniya.

Ismoil Haniyaning so‘zlariga ko‘ra, Turkiya rahbarining qo‘llab-quvvatlashi Falastin muammosini o‘z muammosi deb bilgan va zulmga qarshi chiqqan turk xalqining vijdonini aks ettiradi. Haniya, shuningdek, Prezident Erdo‘g‘onning Shimon Peresning bayonotlariga qanday munosabatda bo‘lganini, BMT yig‘ilishida Falastin xaritasini ko‘targanini va Falastin yerlarining ishg‘ol jarayonini xalqaro hamjamiyat e’tiboriga havola qilganini esladi.

Turkiyada Prezident Erdo‘g‘on va Tashqi ishlar vaziri Hoqon Fidan ishtirok etgan yig‘ilishda Isroilning G‘azo sektoriga yetti oylik hujumi oqibatlari muhokama qilindi. Haniya Falastin tomoni doimiy ravishda o‘t ochishni to‘xtatish va Isroil qo‘shinlarining G‘azo sektoridan to‘liq olib chiqilishini talab qilayotganini ta’kidladi.

HAMAS yetakchisi, shuningdek, xalqaro hamjamiyatni, jumladan, Misr, Turkiya, Qatar va Yevropa davlatlarini Isroil agressiyasining oldini olish va Rafahda ehtimoliy quruqlikdagi operatsiyani oldini olish choralarini ko‘rishga chaqirdi.

«Agar sionist dushman Rafahga kirsa, Falastin xalqi oq bayroqni ko‘tarmaydi. Rafahdagi qarshilik jangchilari o‘zlarini himoya qilishga va o‘z xalqiga qarshi hujumlarga qarshilik ko‘rsatishga tayyor», – deydi Haniya.

U, shuningdek, AQShning Falastinning to‘laqonli a’zolik to‘g‘risidagi BMT Xavfsizlik Kengashi rezolyusiyasiga veto qo‘yganidan g‘azabini bildirgan va G‘azo sektorida ko‘plab qurbonlar AQSh qurollari bilan o‘ldirilayotganini ta’kidlagan.

«G‘azo sektorida o‘ldirilgan barcha tinch aholi, minglab, o‘n minglab qurbonlar Amerika qurollari, Amerika raketalari va Qo‘shma Shtatlarning siyosiy himoyasi ostida halok bo‘ldi», – degan HAMAS yetakchisi o‘z intervyusida.