Ikki nafar O‘zbekiston fuqarosi bir nafar qirg‘izistonlikni o‘g‘irlab, uni 5 oy garovda ushlab turgan. Bu haqda Qirg‘iziston Milliy xavfsizlik davlat qo‘mitasi ma’lum qildi.

Ma’lumot qilinishicha, joriy yilning 28-fevral kuni Qirg‘iziston Respublikasi fuqarosi MXXga murojaat qilib, akasining O‘zbekistonda noma’lum shaxslar tomonidan o‘g‘irlab ketilib, garovda ushlab turilganini ma’lum qilgan.

Aniqlanishicha, fuqaro 2022-yilning 23-oktyabr kuni Qirg‘izistonning Jalolobod viloyati Ala-Buqa tumanidagi «Baymak» nazorat-o‘tkazish punkti orqali aldov yo‘li bilan O‘zbekistonga olib o‘tib ketilgan. Uni o‘g‘irlab ketgan shaxslar fuqaroni 5 oy mobaynida garovda ushlab turgan va uning ozod etilishi evaziga yaqin qarindoshlaridan 50 ming dollar talab qilishgan.

Olib borilgan tezkor-qidiruv tadbirlari natijasida 2023-yil 7-mart kuni o‘g‘irlab ketilgan shaxs Qirg‘izistonga yetkazilib, qarindoshlariga topshirilgan.

O‘zbekiston Davlat xavfsizlik xizmati Qirg‘iziston fuqarosini o‘g‘irlaganlikda gumon qilib, Namangan viloyatida tug‘ilgan ikki fuqaroni qo‘lga olgan.