Hindistonda kichkina filcha bir necha soat davomida o‘lgan onasining tepasidan ketmay faryod qildi va onasini turg‘izishga urindi. «Daily Mail» nashri ma’lumotlariga ko‘ra, qutqaruvchilar kuch bilan filchani onasi yonidan olib ketishgan.

Voqea mamlakat shimolida, Rajaji milliy bog‘ida yuz berdi. O‘rmonchilar o‘lib yotgan fil va uning bolasini ko‘rib qolishdi. Filcha ingraganicha onasini turishga undar, uning ustiga o‘tirar va atrofdagilarning e’tiborini jalb qilish uchun qichqirardi.

Milliy bog‘ xodimlarining fikricha, 40 yoshli ona fil tepalikdan qulab tushgan va bo‘ynini daraxtga urib sindirganicha jon bergan.

Bog‘ direktori Sanataye Sonkarning aytishicha, filchani olib ketish oson bo‘lmagan. «U mutlaqo ketishni istamadi. Biz boshqa fillarni yordamga chaqirishga majbur bo‘ldik», — dedi u.

Rangili va Radxa nomli fillar filchani olib ketishgan va keyin u yuk mashinasiga yuklanib, fillar lageriga olib borilgan. Lagerda filchani qutqargan fillardan biri uni asrab olgan va filcha boshqa fillarga qo‘shilib ketgan.