Kecha tunda Yevropa ligasi va Konferensiyalar ligasi yarim finallarining javob uchrashuvlari bo‘lib o‘tdi. Shomurodov o‘ynaydigan «Roma» jamoasi kichik hisobdagi g‘alaba bilan finalga yo‘l oldi.

Yevropa ligasi o‘yinlarida nemislarning «Aytraxt» jamoasi inglizlarning «Vest Xem» klubi ustidan yana g‘alaba qozondi. Birinchi uchrashuvda ham nemislar mehmonda yutib kelgandi.

Dastlabki o‘yinda kichik hisobda mag‘lub bo‘lgan «Reynjers» esa o‘z uyida boshqa bir nemis klubi «Leypsig»ga imkoniyat qoldirmadi va finalda olmon derbisi bo‘lishiga yo‘l qo‘ymadi.

Yevropa ligasi, yarim final, javob o‘yinlari

Ayntraxt F - Vest Xem - 1:0
Gol: Santos Borre, 26 (1:0).
Birinchi o‘yin: 2:1

Reynjers - Leypsig - 3:1
Gollar: Jeyms Taverniyer, 19 (1:0). Glen Kamara, 24 (2:0). Kristofer Nkunku, 71 (2:1). Jon Lundstram, 81 (3:1).
Birinchi o‘yin: 0:1

Yevropa konferensiyalar ligasida esa Angliyada durang o‘ynagan «Roma» jamoasi o‘z maydonida «Lester»ni kichik hisobda yengib, final yo‘llanmasiga ega bo‘ldi. Shomurodov 89-daqiqada zaxiradan tushirildi.

«Marsel» va «Feyenoord» jamoalari o‘rtasidagi bahs nursiz hisob bilan tugadi. Birinchi o‘yindagi g‘alaba niderlandlarni finalga olib chiqdi.

Roma - Lester - 1:0
Gol: Abraxam, 11 (1:0).
Birinchi o‘yin: 1:1

Marsel - Feyenoord - 0:0
Birinchi o‘yin: 2:3

Shu tariqa yevrokuboklarning barcha finalchilari ma’lum bo‘ldi.

YeChL, final: Liverpul - Real Madrid, 28 may, Sen-Deni, Fransiya

Yevropa ligasi, final: Aytraxt - Reynjers, 18 may, Sevilya, Ispaniya

Konferensiyalar ligasi, final: Roma - Feyenoord, 25 may, Tirana, Albaniya