Yevropa komissiyasi prezidenti Ursula fon der Lyayen Ukraina taklif etayotgan «Tinchlik formulasi» urushni to‘xtatishning asosiy sharti ekanini ta’kidlab, xalqaro hamjamiyatni uni qo‘llab-quvvatlashga undadi.

Islandiya poytaxti Reykyavik shahrida o‘tayotgan Yevropa kengashi sammitida nutq so‘zlagan Ursula fon der Lyayen Ukraina qancha kerak bo‘lsa, shuncha vaqt davomida dastaklanishini ham urg‘uladi.  

«Bugun Yevropaga urush yana qaytdi. Ammo ko‘plab ukrainaliklar uchun bu ziddiyat o‘n yil avval boshlangan edi. Hammasi Maydonda Yevropa bayrog‘ini hilpiratayotgan tinch namoyishchilar merganlar tomonidan otilgan vaqtdan boshlangan edi. Hammasi Rossiya 2014 yilda ilk bor Qrim va Donbassga bostirib kirganidan boshlangan edi», – dedi Yevrokomissiya rahbari.

Ta’kidlanishicha, Rossiyaning Ukrainaga bostirib kirgani asosiy sababi shundaki, prezident Vladimir Putin demokratiyadan qo‘rqadi. Shunga ko‘ra Ukrainadagi urushni qadriyatlar urushi deb atash to‘g‘ri bo‘ladi.

«Ukraina biz ishongan va ardoqlagan qadriyatlar uchun kurashmoqda... Rossiya demokratiyaga qarshi kurashayotgan bir paytda Yevropa birlashgan holda Ukrainani qo‘llab-quvvatlamoqda. Zero, bu – bizning majburiyatimiz. Ukraina xalqi haqli ravishda Rossiyani harbiy jinoyatlari uchun javobgarlikka tortishni talab qilmoqda. Turarjoylarning o‘qqa tutilishi, shafqatsiz qatllar, oilalardan bolalarning o‘g‘irlanishi... 19 mingdan ziyod bola o‘z oilasidan olib qochib ketilgan», – deya urush manzaralariga chizgi berdi yevropalik yuqori martabali siyosatchi.  

Islandiya sammiti davomida aynan harbiy jinoyatchilarni jazoga tortish masalasiga e’tibor qaratilishi muhim, deb hisoblaydi Fon der Lyayen xonim. Chunki adolat tamoyili shuni talab etadi. Qolaversa, jinoiy javobgarlik rossiyalik harbiylarni yangi jinoyatlardan to‘sadi.

«Biz Ukraina tinchlikka, adolatli tinchlikka erishmog‘i uchun barcha imkoniyatlarimizni ishga solamiz. Va biz Ukraina borasida Ukraina ishtirokisiz qaror qabul qilmaymiz. Ukraina taklif etgan «Tinchlik formulasi»ni qat’iy qo‘llab-quvvatlayotganimiz sababi ham shu», – deya xulosa qildi Yevropa komissiyasi prezidenti.

Prezident Vladimir Zelenskiy taklif etayotgan «Tinchlik formulasi»da urushni darhol to‘xtatish, Ukrainaning bosib olingan hududlaridan rus qo‘shinini olib chiqish, harbiy jinoyatchilarni jazolash, shuningdek, mamlakat xavfsizligini har jihatdan kafolatlash belgilangan.