Emlashning yon (nojo‘ya) ta’sirlarini COVID-19 simptomlaridan qanday farqlash mumkin? Ushbu savolga javob qidirgan London qirollik kolleji olimlari vaksinalarning klinik tadqiqotlari natijalarini o‘rganishdi. «Tadqiqotdan keyingi tadqiqot» natijalari «medRxiv.org» serverida e’lon qilindi.

Olimlar 2020-yil yanvaridan 2021-yil 21-iyunigacha oraliqda 15 ming kishida sinab ko‘rilgan Pfizer, Moderna, AstraZeneca va Janssen vaksinalarining klinik sinovlari natijalarini tahlil qilishdi.

Demak, bu sinovlardagi holatlar: taxminan 4 ming kishida koronavirusga xos simptomlar kuzatilgan. Shulardan 2 foizi topshirgan PZR-test musbat chiqqan, ya’ni kovid mavjud bo‘lgan. Simptomi yo‘q qolgan 11 ming kishining 0,8 foizi (taxminan 88 kishi)da koronavirus tasdiqlangan.

Emlash va koronavirus infeksiyasiga xos umumiy yon ta’sirlar: holsizlik, bosh va bo‘g‘im og‘riqlari hamda isitma. Farqi shuki, vaksina olinganining uchinchi kuni bu simptomlar o‘tib ketgan. COVID-19 da esa, aksincha, vaqt o‘tgani sayin kuchayib borgan. Infeksiya yuqtirilganining yettinchi kuniga borib simptomlar eng yuqori cho‘qqisiga chiqqan. Bundan tashqari, kasallanganlarda tomoqdagi og‘riq tobora kuchayib borib, aksirish va ovoz bo‘g‘ilishi paydo bo‘lgan.