Prezidentning tegishli farmoni loyihasi bilan tasbiqdalanadigan Inson huquqlari bo‘yicha O‘zbekiston Respublikasining 2030-yilgacha bo‘lgan Milliy strategiyasini amalga oshirish bo‘yicha “Yo‘l xaritasi”da ehtiyojmand aholiga ijtimoiy uy-joy berish tizimini takomillashtirishga doir vazifa belgilab olingan.

Unga ko‘ra, uy-joyga muhtoj shaxslarning ijtimoiy himoyasini kuchaytirish hamda ehtiyojmand aholiga ijtimoiy uy berish tizimini takomillashtirish bo‘yicha qator chora-tadbirlarni nazarda tutuvchi takliflar ishlab chiqiladi.

Jumladan:

• ijtimoiy uyda yashayotgan har bir oilani mahalladagi ijtimoiy xodim va hokim yordamchisi tomonidan kompleks baholash;
• faqat mehnatga layoqatli a’zolari bo‘lmagan hamda “kambag‘al oilalar reyestri”da turgan oilalarga ijaraga ijtimoiy uy-joy berish;
• kambag‘al oilalarning mehnatga layoqatli a’zosi ishlash sharti bilan uyni ijara olish xarajatlarini qoplab berish;
• kambag‘allikdan chiqqan oilalarning ipotekasiga maxsus subsidiya shartlarini qo‘llash;
• ko‘p qavatli uy-joylarining bir qismini ijtimoiy uy-joy fondiga o‘tkazish.

Ijtimoiy himoya milliy agentligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari esa ishlab chiqilgan takliflarni 2026-yil aprelga qadar Vazirlar Mahkamasiga kiritishlari kerak bo‘ladi.

Qayd etilishicha, mazkur takliflarni amaliyotga joriy etish orqali ehtiyojmand aholining yashash sharoitlari yaxshilanadi hamda ularning ijtimoiylashuvi ta’minlanadi.