Bugun Markaziy bank boshqaruvining oraliq yig‘ilishida asosiy stavkani 1 foiz bandga pasaytirib, yillik 16 foiz darajasida belgilash to‘g‘risida qaror qabul qilingandi.

Markaziy bank stavka tushirilishini quyidagicha izohlagan:

«Pul-kredit siyosatining asosiy yo‘nalishlarida «nisbatan kat’iy» fazada pul bozorida 2-3 foizlik, «qat’iy» fazada esa 4-5 foizlik real ijobiy stavkalar ta’minlashga qaratilgan pul-kredit sharoitlari yuritilishi ko‘zda tutilgan edi. Aprel-may oylarida pul bozorida 6-7 foizlik real ijobiy foiz stavkalar shakllanib, pul-kredit siyosati qat’iylik darajasining yuqori chegarasida shakllanishiga olib keldi.

Asosiy stavkaning joriy pasaytirilishi inflyasion xatarlarni jilovlashga yo‘naltirilgan «qat’iy» pul-kredit sharoitlarini saqlab qolgan holda tashqi xatarlar uchun qo‘shilgan qo‘shimcha yuklamani neytrallashtirishga qaratilgan.

Tashqi iqtisodiy sharoitlar. Savdo-hamkorlarda kuzatilgan xatarli vaziyatning iqtisodiyotimizga qisqa muddatli salbiy to‘lqinlari ortda qoldi va dastlabki baholashlardan farqli ravishda so‘nggi ikki oyda ijobiy tendensiyalar kuzatilmoqda», deyiladi xabarda.