AQShda o‘qishni rejalashtirayotgan xorijlik talabalar uchun vizalar suhbatlari vaqtincha bekor qilindi. 

Ma’lumotlarga ko‘ra, 2025-yil 27-maydan boshlab AQSh elchixonalari va konsulliklariga F, M va J turdagi vizalar — ya’ni talabalar va almashinuv dasturi ishtirokchilari uchun yangi suhbatlarni belgilamaslik buyrug‘i yuborilgan. Hujjatni AQSh Davlat kotibi Marko Rubio imzolagan.

Bu qaror talabalarning ijtimoiy tarmoqlardagi faoliyati asosida chuqurroq xavfsizlik tekshiruvlarini amalga oshirish rejalari bilan bog‘liq. Ayniqsa, Falastinni qo‘llab-quvvatlovchi siyosiy bayonotlar e’tibor markazida bo‘ladi. Shu tufayli, vizani rad etish holatlari ko‘payishi mumkin.

AQShdagi qator oliy ta’lim muassasalari bu siyosatni keskin tanqid qildi. Xalqaro ta’limni qo‘llab-quvvatlovchi NAFSA tashkiloti rahbari Fanta Av bu qarorni «adolatsiz» deya baholadi va xorijiy talabalarni mamlakat uchun intellektual boylik sifatida ko‘rish zarurligini ta’kidladi.

Yangi ko‘rsatmalar e’lon qilinmaguncha, vizalar bo‘yicha arizalar uchun suhbat belgilanmaydi. Biroq avvaldan belgilangan suhbatlar o‘z vaqtida o‘tkaziladi.