O‘zbekiston Respublikasi bosh vazir Abdulla Aripov Qurbon hayiti kuni shoiraning xonadonida bo‘lib, oila-a’zolariga ta’ziya izhor etgani haqida xabar bergan edik.

Hukumat rahbari Qurbon hayiti kuni Anvar qori Tursunov xonadonida ham bo‘lib, oila-a’zolariga ta’ziya izhor etdi. Qur’on tilovat etilib, marhumning haqiga duo qilindi. Bu haqda «Xabar.uz» muxbiri xabar berdi.

Joriy yil 13-iyun kuni Toshkent shahar bosh imom-xatibi Anvar qori Tursunov og‘ir xastalikdan so‘ng vafot etgan edi.

Xalqimizning ma’naviy hayotida alohida o‘rin tutadigan, muqaddas islom dinining ezgu g‘oyalarini yaqqol ifoda etadigan qadimiy bayramimiz Qurbon hayiti insonparvarlik, o‘zaro hurmat, mehr-oqibat, saxovat va shukronalik tuyg‘ularini kuchaytiradi.

Anvar qori Tursunov Qo‘chqorovich 1958-yil 21-noyabrda Toshkent shahri Hamza tumanida xizmatchi oilasida tug‘ilgan. 1966-1976-yillarda Hamza tumanidagi 198-umumiy o‘rta ta’lim maktabida tahsil olgan.

1981-yil Toshkent Davlat universitetining filologiya fakultetini, 2001-yil Toshkent islom institutini tamomlagan. Anvar qori Tursunov mehnat faoliyatlarini 1981-1984-yillarda – «Yoshlik» jurnalida muharrir vazifasidan boshlagan. 1984-1987 yillarda – O‘zbekiston Fanlar Akademiyasida, 1987-1989-yillarda esa Toshkent shahar, Abdulla Qahhor uy muzeyi ilmiy xodim bo‘lib faoliyat yuritgan.

1989-1994-yillarda — O‘zbekiston Yozuvchilar uyushmasi qoshidagi tarjima va adabiy aloqalar markazi Sharq adabiyoti bo‘yicha katta muharrir. 1994-1999-yillarda – Toshkent shahar, Yashnobod tumani, «Yangiobod» jome masjidi imom-xatibi bo‘lgan. 1999-yildan Toshkent shahar bosh imom-xatibi vazifasida faoliyat yuritgan.

Anvar qori Tursunov ommaviy axborot vositalari orqali doimiy chiqishlari, diniy mavzudagi ma’ruzalari bilan xalqimizning qalbidan chuqur joy olgan ulamo edi.

Shuningdek, Anvar qori Tursunov 1989-1992 yillarda Qur’oni karimning birinchi tarjimasiga (Shayx Alouddin Mansur tarjimasi) muharrirlik qilgan.