Qoraqalpog‘istonda mudofaa jangini tashkil etish bo‘yicha majmuaviy hamda maxsus taktik o‘quvlar o‘tkazildi.

Majmuaviy taktik o‘quvda chegara qo‘shinlari bo‘linmalari jangovar navbatchilik vaqtida shartli terrorchilar hujumini qaytardi.

Maxsus taktik o‘quvlarda esa shartli ravishda temir yo‘l transportida, ko‘p qavatli binoda garovga olinganlar ozod etildi, blokpostga qilingan hujum hamkorlikda qaytarildi.

Shuningdek, merganlar juftligi tomonidan aholi yashash punktidagi shartli dushman yakson qilindi.

Jangovar chiziqda joylashgan maxsus taktik o‘quvlar Mudofaa vazirligi, Davlat xavfsizlik xizmati, Milliy gvardiya bo‘yicha Qoraqalpog‘iston Respublikasi boshqarmasi, Qoraqalpog‘iston Respublikasi Ichki ishlar, Favqulodda vaziyatlar hamda Sog‘liqni saqlash vazirliklari bo‘linmalari hamkorligida  o‘tkazildi.

O‘quvlarni Qoraqalpog‘iston Respublikasi Jo‘qorg‘i Kengesi raisi, Mudofaa vazirligi rahbariyati, harbiy okruglar vakillari, hududdagi kuch tuzilmalari mansabdorlari kuzatib bordi.