Sankt-Peterburgda har yili o‘tkazib kelinayotgan MDH davlatlari rahbarlarining norasmiy uchrashuvining joriy yilgisi 26-27-dekabr kunlari bo‘lib o‘tadi. Bu haqda MDH ijroiya qo‘mitasi raisi Sergey Lebedev ma’lum qildi.

«Keyingi hafta Sankt-Peterburgda MDH davlatlari rahbarlarining muhim norasmiy uchrashuvi bo‘lib o‘tadi. Ushbu uchrashuv Rossiya prezidentining taklifiga binoan, 26-27-dekabr kunlari bo‘lib o‘tadi. Umid qilamizki, bu hamkorligimizga qo‘shimcha turtki beradi», – degan Lebedov «RIA Novosti»ga bergan intervyusida.

Eslatib o‘tamiz, MDH davlatlari rahbarlarining oxirgi norasmiy uchrashuvi joriy yilning 7-oktyabrida, Putinning tug‘ilgan kuni munosabati bilan tashkil etilgan va unda O‘zbekiston prezidenti Shavkat Mirziyoyev, Ozarbayjon prezidenti Ilhom Aliyev, Armaniston bosh vaziri Nikol Pashinyan, Belarus prezidenti Aleksandr Lukashenko, Qozog‘iston prezidenti Qosim-Jo‘mart To‘qayev, Tojikiston prezidenti Emomali Rahmon va Turkmaniston prezidenti Serdar Berdimuhamedovlar qatnashgan edilar.