«O‘zbekkino» milliy agentligi buyurtmasiga asosan, yana bir buyuk siymolardan biri — Imom Iso at-Termiziy haqida hikoya qiluvchi filmni suratga olishga qizg‘in hozirlik ko‘rilmoqda. Bu haqda agentlik axborot xizmati xabar berdi.

Shu kunlarda rejissyor Abduxalil Mingnorov tomonidan aktyor va aktrisalar guruhi sinovdan o‘tkazilmoqda. Film ijodkorlarining yakuniy tarkibi esa 2-fevral kuni bo‘lib o‘tadigan Badiiy kengashning navbatdagi yig‘ilishidan so‘ng ma’lum bo‘ladi.

Ijodkorlar «Dunyo bo‘ylab» telekanali ijodkorlari tasvirga olish maydoniga tashrif buyurib, jarayonni bevosita, jonli kuzatdilar. Joriy yilning 3-fevral kuni soat 19:05 da ushbu telekanal orqali efirga uzatiladigan «Tafsilot» ko‘rsatuvi orqali film haqida batafsil ma’lumotga ega bo‘lish mumkin.

Film ssenariysi muhaddis olim — Abu Iso at-Termiziyning hayoti, faoliyati bilan bog‘liq voqealar va uning ustozi Imom Buxoriy bilan o‘tkazgan mashg‘ulotlari haqidagi hikoyalar asosida yozilgan. Loyihani amalga oshirishda Shayx Abdulaziz Mansur ham o‘zining qimmatli maslahatlari va ko‘rsatmalari bilan ishtirok etmoqda.