SSV huzuridagi Koronavirusga qarshi kurash shtabi a’zosi Nurmat Otabekov kuz-qish mavsumida kasallik avj olib ketish ehtimoli xususida ma’lumot berdi. 

Kuz-qish mavsumi gripp, paragripp, o‘tkir respirator kasalliklar avj oladigan davr xisoblanadi.

Koronavirus qo‘zg‘atuvchisi ham nam va past haroratni yaxshi ko‘radi. Hamma viruslar singari koronavirus qo‘zg‘atuvchisiga ham issiq va quruq havo noqulay hisoblanadi va bunday sharoitda kasallik virusi tezda nobud bo‘lishi mumkin.

Biz hali bilmaymiz yurtimizga xos bo‘lgan respirator kasalliklar virusi bilan koronavirus qo‘zg‘atuvchisi qanday chiqishar ekan.

Mikroorganizmlar hayotiga xos bo‘lgan antogonizm va sinergizm tushunchalari bor.

Agar odamlarda uchraydigan respirator kasalliklar virusi va koronavirus bir biriga antogonist bo‘lsa va kishida boshqacha sinergist mavjud bo‘lsa boshqacha epidemik vaziyatni kuzatishimiz mumkin bo‘ladi.

Lekin nima bo‘lganda ham ushbu mavsumda kasallikning ko‘tarilishini bashorat qilsak to‘g‘ri bo‘ladi.

Maktablar ochilgani to‘g‘ri qarormi, ular faoliyatining boshlanishi koronavirus kasalligi bo‘yicha epidemik vaziyatga nechog‘liq ta’sir qilishi mumkin?

Albatta to‘g‘ri qaror. Biz bir umr bolalarimizni uyda qamab o‘tira olmaymiz, ular ham aynan shunday murakkab epidemik vaziyatda yashash, o‘qish va u yoki bu ish bilan mashg‘ul bo‘lishga o‘rganish kerak.

Buning ustiga bolalarda koronavirus kasalligi yengil kechadi, ularda yondosh kasalliklar bo‘lmaganligi uchun jiddiy asoratlarsiz barchasi tuzalib ketadi.

Hozir respublikadagi maktablarda tegishli tayyorgarlik ishlari olib borilmoqda. Qariyb o‘qituvchilarning barchasi koronavirusga test tekshiruvlaridan o‘tkazildi.

Maktablarning dezinfeksion va epidemiyaga qarshi, profilaktik tadbirlarni amalga oshirish bo‘yicha tayyorgarligi o‘rganib chiqildi, mavdjud kamchiliklar bartaraf etildi va birin-ketin ularning faoliyati tiklanmoqda.

Maktablar faoliyatini tiklashi barobarida kasallanish ko‘rsatkichi ham ortishi mumkin. Bu tabiiy hol, negaki matablarda bolalarning va o‘qituvchilarning muloqoti oshadi va kasallikning bir odamdan ikkinchi odamga o‘tish ehtimoli kengayadi.

Bunday paytlarda maktablardagi filtrlar yaxshi ishlashi, xodimlar sergak bo‘lishi bilan bir qatorda kasallik belgilari kuzatilgan bolalarni maktabga yubormaslik, bu haqda maktab ma’muriyatini xabardor qilish bo‘yicha ota-onalarning ham mas’uliyati yuqori bo‘lishi zarur. Bunday talablar o‘qituvchilarga ham taalluqli.