Yangi koronavirus klassik epidemiologiya qonunlaridan tashqariga chiqib ketdi, uning «oyoq olishi» qandaydir g‘alati. RBK yozishicha, Federal tibbiy-biologik agentlik (Rossiya) bosh infeksionisti Vladimir Nikiforov shunday fikr bildirgan.

Nikiforovning aytishicha, bemorlarning o‘pkasi holati va o‘zini his qilishi o‘rtasidagi nomutanosiblik tushunarsiz. Ya’niki, kompyuter tomografiyasiga binoan kamida jonlantirish bo‘limi (reanimatsiya)da yotishi kerak bo‘lgan bemorlar hech narsa ko‘rmagandek, o‘zlarini yaxshi his etib yurishadi.

Bu vaqtincha. Keyin dahshatlisi boshlanadi, qo‘shimcha qiladi u.

Ilgarigi pnevmoniyalar rentgenda ko‘rinardi, hozirgisini (koronaviruslisini) kompyuter tomografiyasisiz ko‘rishning aslo ilojisi yo‘q, deydi Nikiforov.

Hammasidan ham g‘alati jihati, ta’kidlaydi infeksionist, koronavirus epidemiyasi «klassik sxema» bo‘yicha uch oyda tugashi kerak edi. Uning esa to‘xtaydigan shashti yo‘q. Dunyo qandaydir «yangi narsa»ga yo‘liqqanga o‘xshaydi.