20-iyul kuni Braziliya koronavirusga qarshi Xitoy vaksinasini sinab ko‘rishni boshlaydi, deya xabar berdi San-Paulu shtati ma’muriyati.

«Sog‘liqni saqlashni nazorat qilish milliy agentligi koronavirusga qarshi vaksinalar xavfsizligi va samaradorligini tekshirish uchun klinik tajribalarning uchinchi bosqichini boshlashga ruxsat berdi», — deyiladi xabarda.

Gap Pekin biofarmatsevtika kompaniyalari tomonidan ishlab chiqilgan vaksinalar haqida bormoqda.

Tadqiqot uchun oltita shtatda koronavirusni yuqtirganlar bilan ishlayotgan tibbiyot xodimlari orasidan 9 mingta ko‘ngilli saralab olinadi.

Ayni vaqtda Braziliya Britaniyaning Oksford universiteti tomonidan ishlab chiqilgan vaksinani sinovdan o‘tkazyapti.

Jahon sog‘liqni saqlash tashkiloti 11-mart kuni yangi COVID-19 koronavirus infeksiyasi tarqalishini pandemiya deya e’lon qildi. JSST ma’lumotlariga ko‘ra, dunyo bo‘yicha 11,3 milliondan ortiq kishi kasallikka chalingan bo‘lsa, ulardan 532 ming nafari hayotdan ko‘z yumdi.