O‘zbekiston musulmonlar idorasida «27 iyun – Matbuot va ommaviy axborot vositalari xodimlari kuni» munosabati soha xodimlarini rag‘batlantirish tadbiri bo‘lib o‘tdi.

Tadbirda O‘zbekiston Musulmonlar idorasi muftiysi Usmonxon Alimov, O‘zbekiston jurnalistlari ijodiy uyushmasi raisi Olimjon O‘sarov, din ulomalari va ommaviy axborot vositalari xodimlari ishtirok etdi.

«Siz aziz ijod ahlini «27 iyun – Matbuot va ommaviy axborot vositalari xodimlari kuni» munosabati bilan chin qalbimdan samimiy muborakbod etaman. Haq taolodan barchangizga sihat-salomatlik, ijodiy faoliyatingizda yutuq va omadlar, oilaviy baxt, xonadonlaringizga tinchlik-xotirjamlik, fayzu baraka tilayman», – deb tabrikladi Usmonxon Alimov.

Muftiy so‘nggi yillarda mamlakatimizda amalga oshirilayotgan islohotlar to‘g‘risidagi ma’lumotlarni o‘z vaqtida taqdim etish, aholiga tezkor va to‘liq axborot yetkazish, ochiqlik va shaffoflikni ta’minlashda katta natijalarga erishilganini alohida ta’kidlab o‘tdi.

Jurnalistlarga tabrigining so‘ngida muftiy Usmonxon Alimov shunday dedi: «Ijod ahli mehnatini naqadar mashaqqatli ekanini anglagan kishi sifatida kamina, sizlarning sa’y-harakatingizni doimo qo‘llab-quvvatlayman, sizlarni eng asosiy tayanchim va eng yaqin yordamchim deb bilaman. O‘z navbatida O‘zbekiston musulmonlari idorasi barcha ijodkorlar bilan yaqindan hamkorlik qilishga tayyor ekanini bildiraman».