Ramazonda o‘tganlarni eslash, xotirlash savobli ish, deydilar. Biz bugun majburiy mehnatning qurboni bo‘lgan, 23 yoshida fojiali halok bo‘lgan o‘qituvchi Diana Yenekeyevani xotirlashni lozim topdik.

Diana yaxshi o‘qituvchi, mehribon ustoz, borini maktabga fido qilgan jonkuyar muallim bo‘lib xotiralarimizda yashaydi. Yillar o‘tadi, ammo Diana yodimizda 23 yoshli yoshgina dilbar inson bo‘lib qolaveradi.

Biz ijodiy guruhimiz bilan Diana Yenekeyeva ishlagan Kattaqo‘rg‘on tumanidagi 42-maktabga bordik. Diananing hamkasblari uni eng iliq so‘zlar bilan xotirlashdi.

— Ertalabmi, kechqurunmi, Diana kerak bo‘lsa, uni maktabdan topar edik, — dedi bir hamkasbi. — U o‘zini butunlay maktabga bag‘ishlagan edi.

— Diana maktabdagi barcha bayramlarni o‘tkazishda bosh-qosh bo‘lardi, — dedi yana bir hamkasbi. — Kerakli jihozlarni tayyorlash uchun hatto eri Yegorni ham chiqirib olar, eri ham xuddi jamoamizning bir a’zosidek bo‘lib qolgan edi.

Diana sinf rahbari bo‘lgan 6 «v» sinf o‘quvchilari ustozlarini qanday xotirlashganini yozish og‘ir. O‘quvchisi ustoziga atab yozgan she’rni eshitish undan ham og‘ir, yaxshisi, o‘zingiz ko‘ring, eslang, unutmang!

Karimberdi To‘ramurod,
«Xabar.uz»ning maxsus muxbiri