Tahririyatimizga respublikamizning turli joylarida yashaydigan aholidan murojaatlar kelishi davom etmoqda. Xususan, quyidagi murojaatda elektr energiyasi yetishmovchiligidan aziyat chekkan fuqarolar dardi anglashiladi:

«Hurmatli Prezidentimiz Shavkat Mirziyoyev, aholini qiynayotgan bir masala bo‘yicha sizga qishlog‘imiz aholisi nomidan yozmoqdamiz.

Qashqadaryo viloyatining Chiroqchi tumanida («O‘zbekenergo» AJ Qashqadaryo XET AJ PS Chorvador 35/10 kv) elektr energiya yetishmovchiligidan aholimiz qiynalmoqda. Bizning daromadimiz chorvachilik va dehqonchilikdan. Bu yil tabiat injiqliklari sabab chorvamiz og‘ir ahvolga tushib qoldi.

Endi bor umidimiz dehqonchilikdan, aksiga olib, elektr energiyamiz cheklangan, sutkasiga 6 soat tok beradi. Bu ahvolda chorvachilik ham, dehqonchilik ham qilib bo‘lmaydi. Bugun (12.05.2018 soat 12:00 larda) Qanotli MFY, Gujumli MFY, Toshli MFYda yashaydigan fuqarolarimiz norozilik bildirib, Chorvador PS oldiga yig‘ilishdi. Bu insonlarning dardini eshitadigan biror-bir rahbar yo‘q.

Fuqarolarimizning bor umidlari hurmatli Prezidentimizdan. Chorvador elektr podstansiyamizni ta’mirlashda amaliy yordam bering», deya yakunlanadi murojaat.